Kan haider thei reng a; kan ngaihsak pawh an ngai e
Khawchhak lam atanga Kuhva ro phurh luhin tawp ni hmel a la hmu thei lo a, a phurtute lahin dan ang taka chhiah an pek miau avangin thil tisualah an inngai hek lo. Sorkar hian a hriatpui ngei a, heng atang hian chhiah tam tak pawh a lut ngei tih a chiang reng mai.
Hetih lai vek hian vawiin thlengin thenawm Myanmar ram buaina avangin raltlan an rawn lut reng a, sorkar in central lam auchungin hma an la ve reng bawk niin insawi mah se, a tak takah chuan mi tlawmngaite pekkhawm leh thawhkhawm hmanga khawsa naw naw an ni fur thung.
Kan sorkar hrawn mek hian sum lamah harsatna lian tak a nei tih chu a hriat reng mai a, mahse, kan unau, kan chipui ngeite tan chuan a theihna zawng zawng hi a hmang tur a ni dawn lo’mni? Tawngka chauha hmangaih leh ngaihsak hi a tawk tawh lo a, Kuhva ro phurh mah an haider thei a nih chuan kan unau manganga rawn tlanchhiate hi chu central lam tichhen lo hian ngaihsak an ngai tawh hle.
Raltlan luh tamna Tuipuiral huam chhunga khaw 21-ah pathianni thleng khan raltlan 2,627 an awm mek tih Tuipuiral Group YMA hruaituten an sawi a, raltlan an thahnem chhoh zel lai hian mi tlawmngaiten buhfai an thawhkhawm erawh a tlem chho hle tawh tiin, buhfai ei tur an tlachham tan chho tih an sawi a, ngaihsak leh ngaihtuah mai bakah buaipui tham an ni tawh.
Sorkar hian school kal rualah chuan theihtawpin an zirna chhunzawm tura ke an pen thu kan hria a; an nitin mamawh, a bikin ei leh bar kawngah pawh hian a ngaihsak zual a ngai hle mai. Tawngka a inhmangaih hi chu a har lo, a taka chet chhuah hun chu tun hun hi a ni.