Rohingya refugee camp beihnaah mi pasarih that


Bangladesh-Myanmar ramri bul, Bangladesh ram chhunga Rohingya refugee camp-a Islamic seminary (sakhaw thu zirna) beihnaah mi pasarih an thi niin Bangladeshi police chuan an sawi.
Beitute hian thenkhat hi an kap hlum a, thenkhat hi an vut hlum thung niin helai vel bialtu police chief chuan Zirtawpni khan AFP news agency a hrilh.
Mi pali hi a hmunah an thi a, pathum erawh Balukhali camp-a damdawi ina lak an nih hnuah an thi a. Police chuan mi eng zat nge hliam tuar an sawi lo.
“Thil thlenna hmunah hian a titu mi pakhat man nghal a ni,” tiin police hotu, Shihab Kaisar Khan chuan thuthar lakhawmtute a hrilh.
An mi man hian silai leh a mu paruk bakah chemte a lo kawl niin a sawi.
Chawlhkar thum liam taa a pisa kawta Rohingya hnam hruaitu, Mohibullah kah hlumna boruakin a la chiah lai mekin hetiang thil hi a thleng leh a ni.
Inthahna a thlen hnuah hian Home Minister Asaduzzaman Khan Kamal chuan tuipui kam, Cox’s Bazar district-a Rohingya camp-ahte venhimna tha zawk a awm theihna turin ruahmanna siam nghal a nih thu a sawi.
“Mihring bakah tun lai thiamna hmanga venhimna tur pek nghal an ni ang,” a ti.
Minister chuan ramri vengtute pawh khauh lehzual tur leh Rohingya camp-a ruihhlo tawlh luh thinte pawh uluk lehzuala endik a ni dawn tih a sawi.
Bangladesh leh Myanmar inkalpawhna awmchhun, Naf luia chevel thlithlaitute pawh tihchang an nih tur thu a sawi bawk.
Kamal-a chuan camp hungna, barbed wire siam mek pawh zawh fel tep a nih thu a sawi a, ralven buk eng emaw zat siam a ni tel a, heta tang hian camp chhunga che vel pawh uluk lehzuala vil theih a nih dawn thu a sawi.
Rohingya mite viltute chuan Mohibullah-a thah a nih hnuah khan an zingah hlauhna a awm a, tam tak chu an biru niin an sawi.
Nikum December khan Bangladesh sorkar, Myanmar atanga Rohingya raltlan maktaduai vel mikhualtute chuan raltlan 20,000 vel chu Bhasan Char thliarkatah an awmna a sawn.
United Nations nen inremna an siam angin raltlang dang mi 80,000 vel chu thliarkar kilkhawr takah hian sawn leh a la tum mek bawk.
Bhasan Char hi Bangladesh chhimchhak lam vaukam atanga km 50 vela hlaa awm niin Dhaka atang chuan km 193 dawna hla a ni a. Sorkar chuan raltlan dahna tur in inzawm 1,400 a sa a, in pakhatah hian pindan 16 zel a awm dawn a ni.
Rohingya-te hi kum 2017-a an hnam hel pawlin Myanmar sipaite an bei nia sawi avanga sipaiten an beih let avanga tlanchhia an ni a, sipaite hian hel pawl chauh ni lovin a hnam angin suat a tum nia puh an ni a, Myanmar sorkar erawh chuan a pha nasa hle thung.
&&&&

Leave a Reply

Your email address will not be published. Required fields are marked *

error: Content is protected !!