Aizawl City Local Council Association (ACLCA) Executive- committee vawi hnihna chu nimin khan Dawrpui Multipurpose Centre-ah neih a ni a, Aizawl Mayor Lalrinenga Sailo in a hmanpui.
Aizawl Mayor Lalrinenga Sailo chuan, “Local Council kan neih hi phai lama municipal corporation-te pawhin an awt em em a, a zirchianna pawh an rawn nei hial a ni,” a ti a. “Property tax hi dik taka mipuiten an pek hian kan tan vek a ni,” tiin, thahnemngai taka tax pe turin mipui a sawm.
Aizawl Bawrhsap Dr Lalhriatzuali Ralte pawhin thu sawiin local council-te chu sorkar kut leh ke an ni a, Covid-19 hripui dona kawngah pawh an che tha hle tih a sawi a, local council member zinga Covid avanga boral an awm chu pawi a tih thu a sawi.
Dr Lalhriatzuali Ralte chuan Aizawl district chhunga Covid-19 avanga boral mi 205-te tan ex-gratia tihfel a nih tih sawiin, Krismas leh kumthar vuakvetah halpuah leh halmawi tumah hal lo turin mipui a ngen.
ACLCA Executive committee thukhawm chuan local council-ten signature an lo peka pawisa an lak thin rate, an siam tha a, ILP-ah Rs 500, Advertisement/ Hoarding-ah Rs 500 leh ram teh leh enah Rs 500 an la tawh dawn a, kum 2022 chhungin general assembly neih nise an ti bawk.