Arunachal Pradesh hmun kilkhawr tak, tlangram mawi takin a hual vel kara khaw pakhat, chhungkaw 100 vel lek emaw chenna, Thembang khua chu UN-in a humhalh hmun, World Heritage Site-a telh ve tumin hma lak mek a ni.
He khua hi a chhehvelah hman lai hun rei tawh taka hmun leh an sulhnuin a hual vel a ni.
Thembang hi kum zabi 12-na hun lai atang tawha mihring chenna khua niin United Nations Educational, Scientific and Cultural Organization (UNESCO) World Heritage Site nih tuma chhawp chhuah zingah a tel ve mek.
Tun hma chuan he khua hi lal chak leh thiltithei tak, Cha-Cha-Nye an tih chuan a awp thin a, thawnthuah chuan van atanga lo chhuk tawp nia sawi thina ni.
A rore chhung hian ram zau tak awpin chhiah pawh a hnenah an chawi thin a. Tuna Bodo ram ni ta, Darrang district, Assam-a Mishamari, Udalguri leh Mazbat thlengin chhiah an pe thin.
Hmun upa, thil hluiin a hual a nih vang ngawta khawvel hmun humhalh ngai zinga chhiar tel tura tih a ni mai lo va; Thembang khuaa chengte nun dan hrim hrim hi humhalh ngai a ni.
Hman lai in sak an kawl zinga hriat hlawh tak chu ‘Dzong’ a ni a. Kulh niin lung leh thing hmanga mawi taka sak a ni. Hmar leh chhimah gate a nei a, luh nana hman thin a ni a, tunah erawh chhuahka a ni tawh.
Tun hma chuan he kulh kawngka hi ni a tlak rualin an khar thin a, hei hi khuaa chengte himna tur atana an tih a ni a, ni a tlak chuan kulh chhungah awm hman vek tura tih an ni.
A khaw chhehvelah hian puk pawh a awm teuh va, hengte hi sakhuana thil nena inzawm a ni hlawm a. An puk zingah hian Mani leh Chorten chu hriat hlawh a ni a, Gonpa (Buddhist Temple) chu an khaw chhipah awmin hei hi chei thar tawh a ni.
Gonpa hi thing ker mawi tak taka chei a ni a, thu ziak eng emaw zat ker niin tun thlengin uluk taka la vawn that a ni.
Khuaa chengte pawh hian hman lai atang tawhin an nunphung an thlak lo hle a. An bul hnaia Bhutanese, Tibetan leh hmarchhaka mi dangte nunphung lakchhawn nei zeuh zeuh mah se tun hmaa an khawsak dan, an invui dan te, an inneih dan leh a dang tam tak chu an la chhawm reng.
An khua hi tlangdung, metre 1500 atanga 7000 inkar vela sang kara awm niin tlangdungah hian thing mawi tak tak, danglam tak tak pawh a awm.