Ministry of DoNER hnuaia non-lapsable central pool of resources (NLCPR) kaltlanga Rural development department-in project lian a kalpui hmasakber, Rs. nuai 369.89 senga sak Khawbung mini sports complex chu nimin khan RD minister Lalruatkima’n a hawng.
RD minister chuan sports minister nen an inrawn hnuah external aided project (EAP) kaltlanga Khawbung mini sports complex-a phullem phah tura hmalak tum a nih thu leh TATA Trust football academy dah tum a nih thu a sawi a. “Football academy atangin inthununna leh aia upate zahna zir a ni tel dawn a, chu chuan khawtlangah inlungrualna leh thuawihna a thlen ngei ka beisei” a ti.
NLCPR kaltlangin Aibawk, East Lungdar leh Khawbungah te mini sports complex sak hna kalpui a nih thu RD minister chuan a sawi a. “Mihringte hriselna leh theihnate hailang turin infiamna hmunhmate thawmtha chung zela hmalak thin a ni” a ti a. Pipu sulhnu tamna leh infiamna huanga mihmingthate tamna East Tuipui biala infiamna hmunhma changtlung tak din a ni chu a lawmpui thu a sawi.
RD minister chuan infiamna hmunhma tha tak an neih thar chu thalai ten chhawr tangkai ngei se a duh thu sawiin, sports policy tha tak sorkain a duan thu leh infiammite tan hamthatna tam tak a awm thu a sawi a. A tha lam kawng zawh leh inchophur tawn chunga hmalak a tul thu sawiin, “Kan intihphurtawn phawt chuan hma kan sawn ngei dawn a ni”, a ti.
Hrileng kara Khawbung mini sports complex hawn theiha peihfel a ni chu lawmawm a tih thu sawiin, RD minister chuan hawn a nih hmaa vanduaithlak taka a hnathawktu contractor C Lalnuntluanga’n chatuan ram a pan erawhin rilru a tih khingbai thu a sawi bawk.