Lunglei North bialtu MLA Dr. Vanlalṭanpuia’n nimin khan a bial chhung hmun thuma Myanmar raltlante dinhmun enfiahin a tlawh a. Raltlante hi Haulawng-ah hmun hnihah dah an nih bakah Zotuitlangah te dah an ni a, bialtu MLA-in a tlawh lai hian mi 95 an awm a ni.
Dr. Vanlaltanpuia chuan Myanmar ram chhung buaina avanga Mizorama raltlante chu “Kan unaute vek in ni” tiin, “Ramin ri nei mahse, hnamin ri a neih loh avangin lo lungngai suh u” tiin a tlamuan a. Mizoram sorkarin a ngaihthah dawn lo niin a sawi.
Lunglei North bialtu MLA chuan COVID19 len nasat lai ni mahse, a bial chhunga raltlan te tan theihtawp a chhuah zel dawn tih a sawi a. “Nangmahni In lum dam taka thleng leh vek turin ka duhsak che u a ni” a ti bawk.
Dr. Vanlaltanpuia chuan Haulawnga raltlante tan Buhfai bag 15, Alu bag 3, Tel case 3 leh Nutrella bag 6 bakah Rs. 30,000 a pe a. Zotuitlanga raltlante tan test kid 100, face shield engemawzat leh sum fai engemawzat bakah raltlan buaipuitute tan sum pein, Raltlan steering committee, Haulawng te hnenah Covid test kid 100 leh Rs 10,000 a pe bawk a ni.