- Lallunghnema, Charity Lodge
Consumer Huang chhuak hnuhnung berah khan Serchhip District Consumer Association hruaitute hmalakna avanga Consumer pakhat hnehna chanchin ropui tak ka rawn ziak tawh a.Thil tihnaa seh tlat pawl kan awm hian a tawpah chuan a lo hlawhtling nge nge thin. Consumer hruaitu fel tak tak leh huaisen tak takte, Consumer Commission President leh Memberte huaisennate chuan consumerte a tihuaisenin a tichak a,a tilawm thin a ni. Hlawhtlinna pawh an chang chawk thin a ni. Consumer Court a complaint theh luh hi mi huaisen hna a ni a. Mi huaisente ta erawh a ni bik chuang lo. Mi dawihzepte intih huaisenna pawh a ni pah reng. Mahse, Consumer Court-a Thubuai neih ai chuan inkhing kher lo va, insiam rem hi a thlanawm zawk a, Pawl pahnihte inkhing buai lova, inrem hi a kristian em em bawk a ni. Consumer Commission hmaa inkhin hi pumpelh hram tum zawk tur a ni. Consumer Court hnena zualko hi a kaw tawp a ni tur a ni. Mizote phei hi chuan Thubuai neih hi kan hre thiam lo tlangpui a, kan hreh hle thin a ni. ‘Inkhin’ tawngkam hi kan chek hian a ngeih lo a ni ber. Kei ve tak ngial pawh hian Consumer Courta ka awm ve lai pawh khan complainant leh opposite Party-te (thubuai nei, khinte – llh) hnenah hian inhaw zui lo hram turin ka chah mawlh mawlh thin a ni.
Tichuan, ka’n ti hluai ang a, kan thu khel tur hi LPGas Double Connection tihnaa buaina thleng chung chang a ni. Buaina tih lemah silai hmanga inkahna lam ni lovin tharum thawh a buaina ni hek lovin Gas man pek leh pek loh avanga inhnialna leh thu inchuh kal zel thubuai daih rei tak chungchang leh chinfel a nih dan kan sawi a ni zawk e.
Kum hnih kal ta, 2019 khan kan khua Thingsaiah Programme pawimawh tak hmangin June thlaah ka han kal a. Chumi tum chuan North Vanlaiphai Gas Agent hnena DBC tih tum mi 20 chuang zet chuan harsatna an tawh thu leh thuneitu hnena thlensak turin min lo pun a.
A tawi zawngin ka sawi ang. Director hnena lehkha buatsaih turin thurawn ka pe hlawm a. Chu an lehkha chu Aizawl lama keng thlain Supply Director, Pi Hriati hnenah keima private lehkha thil telin ka thehlut ta a. Ani, Director viak tha tak chuan a tul ang anga action la vat turin Serchhip DCSO hnenah chuan chu kan naute zualkona lehkha chu a pek chhohtir nghal a. DCSO chuan chu lehkha chu a hmuh veleh ni 14 October 2019 khan N.Vanlaiphaia Indane Gramin Vitrak Agent chu hengho hnenah hian Gas Double Connection pe thuai turin hriattirna a pe a. Mahse, he Gas Agent, North Vanlaiphaia mi hian pawisa an dawn loh thu sawiin Connection a tihsak mai theih loh thu a lo hrilh a ni awm e. Gas double connection tih tumte chuan Thingsaia Sub-Agent hnena pawisa an pek thu an sawi bawk a. Sub-Agent pawhin pawisa a dawn ngei thu leh driver kuta a hlan vek thu a sawi bawk a ni. Mahse, hetih lai hian pawisa hmuh leh hmuh loh thu hla avangin Thingsai a, kan naute chu kum hnih liam hnuah pawh DBC pek an la ni lo fova. Hei hi an buaina ber chu a ni ta a ni.
Hetianga thil a kal avang hian kan naute nen kan indawr reng a, kei pawhin DCSO ka be thin bawk. Kawng hrang hrangin chhui a niin um zui a ni a. Police hnen First Information Report theh luh a ni hial a. Police pawhin hma lain pawisa inpek chungchang chu an chhui a.
Mahse, heng LP Gas double connection booking tituten an beisei ang a connection tihsak an nih loh cheu avangin Serchhipa Consumer Association hruaitute puihnain Serchhip District Consumer Disputes Redressal Commission hnenah an zualko ta a ni. Commission chuan case ngaihtuah tlakah a lo pawm a. Case NO.CC.09 of 2021 pek a ni.
Ni 8 December 2021-ah hearing neih a ni a. A tawi zawngin sawi mai ila, ngun taka Consumer Commission hian a ngaihtuah hnuin Consumer Prctection Act 2019 section 38(1) (c)(d) tan chhana hmangin Judgement a ti chhuak ta a ni. He Judgement hian Complainant-ten Connection pakhat atana Rs 2350/- zel Gas Agent hnena an pek chu pe kir leh turin Gas Agent chu a ti ta a ni.
He Order hi ni 13/12/2021-ah tih chhuah ghal a ni. Khawvela Court hna thawk chak ber zinga mi a ni ngei ang. Mizoramah phei chuan record a ni hial mai thei a ni a. He Judgement &Order hi ni 30 chhung tihfel tur a ni.
Ka thlir dan chuan Serchhip District Consumer Commission President leh Memberte hi an huaisen hle a, an ti tha bawk. Chutiangin helaia Consumer hruaitute hi an chak hle bawk. Thingsai Consumerte hi an dinhmunah an chiang a, an ti thain an entawn tlak hle a ni. District danga Consumer Commission-te pawh hian entawn se a tha ang.
He Consumer Commission Judgement hi social mediaah pawh a darh nasa hle a. Mite fak leh lawm an hlawh hle a ni. He Judgement tihhlawhtlin a nih dan ka zawhnaah chuan consumer zinga mi, Pi Darropuii chuan pawisa aiah LP Gas Double Connection pek an nih thu min hrilh a ni. Thil lawmawm tak, consumerte hnehna hlu tak chu a ni chhap e.
Mahse, kum hnih chuang fe an lo buai tawhna kha a tuartu tan chuan a thinrim thlak hle tho a ni.
Hetih lai hianSumdawng tha tak tak, fel em em, mi dangte tana malsawmna ni hliah hliah an ngir khup laiin sumdawng tam tak mahni hma chauh sial thiam fahran, sum hmaa khaw eng pawh hmu ngai lo hi a sang a sang hmun hrang hrangah an insehmur tuau tuau a,an intawk zut zut mai a nih hi!
Hengho hian consumerte khawvel an chawk buai thin a ni! Corruption kawng hawngtu an ni bawk! A tawpah chuan an buai mualhpo thova, a tuartu zing mi an ni tho. An hlim rei bik chuang hek lo. A tawpah, a buai ber berah an tang leh thin. An hlim rei bik chuang lo.
Consumer harh rawh!
Nitin bumin i awm hi!
Nitin tihretheih a i awm hi!
Nitin rawkin i awm hi!
Bumtute lakah fimkhur la,
Tihdertute lamah beng dawh hek suh.
Consumer nih inpawm lotu chu
Amah a inbum a ni..
Khawi indonaah mah
Hnehtu a ni ngai lovang .
Chhiartu duh tak,
(Consumer-te dikna leh chanvo hriatna )Youtube Channel hi lo subscribe ve rawh. I tan, in chhungkaw tan a ni e.
Zawhna i neih chuan min zawt la, kan thiam ang angin kan lo chhang ang che. I thil lei leh hmannaah harsatna i tawk a nih chuan a thlawnin kan lo tanpui ang che.
Dik takin thil lei la,
Dik takin hmang rawh.