European football thuneitu UEFA chuan tun season Champions League final chu Russia leh Ukraine inkar boruak avangin Saint Petersburg a\anga sawn chungchang an ngaihtuah mek.
Russia in kum 2018 World Cup a thlen \uma an stadium sak thar zing ami Krestovsky Stadium-ah kumin Champions League final hi nghah a ni a. Kum 2008 final a Moscow in Manchester United leh Chelsea inkhel a thlen hnua Russia in club football a inkhel lian ber a thlen \um hnihna a ni ang.
Saint Petersburg hi nikum khan final thleng tur an ni a, nimahsela Covid 19 avangin UEFA chuan kum 2020 leh 2021 final chu Portugal-ah a nghat a. Lisbon leh Porto ten an thlen phah.
UEFA chuan a thlengtu ni tura a ruat tawh sa Istanbul leh Saint Petersburg te chu 2022 leh 2023 thleng turin a ti ta zawk a ni.
Saint Petersburg hi Champions League sponsor tu lian Gazprom hmunpui a ni a, mahse tunhnaia Russia leh Ukraine inkar boruak sosang telh telh avangin UCL final a thlen theih tak loh hmel hle.
Engtin zel nge?
UK sorkar leh European Union te chuan Russian president Vladimir Putin-a’n Thawh\anni a Ukraine ram chhunga khaw lian pahnih Donetsk leh Luhansk te zalenna an pawm tih a sawi hnuah Russia thil tihdan an duh loh thu an sawi tawh a. Russia lakah hian khauh zawka inhrekna kalpui an inpeih EU pawhin an sawi tawh.
UEFA hian Saint Petersburg a final sawn chungchangah hian thutlukna an la siam lova, mahse sawn ngai ta se an neih theihna hmun tur an zirchiang mek niin an sawi.
Tunhnaia final hnuhnung pahnih an sawn tawh avangin sawn leh mai pawh a harsa tawh dawn lo nia ngaihna a awm bawk.
English club pali – Manchester City, Manchester United, Liverpool leh champion lai Chelsea te an la dam avangin Wembley Stadium sawirik a ni a. Mahse Wembley hi kum 2024 final thleng tura tih a ni tawh.