Mizoram chief secretary hlui, Lalnunmawia Chuaungo chuan ‘Mizoram First’ Movement (MFM) din a nih thu sawiin, he movement-ah mi zawng zawng tel turin a sawm.
Nimin khan Aizawl Press Club-ah thu thar thehdarhtute kawmin, ‘Mizoram First’ Movement President Lalnunmawia Chuaungo chuan an din chhan sawiin, “Ram inrelbawlna kawngah awmze neia chak taka kalpui thei tur chuan thawhhona platform a awm a ngai a, chumi atana ruahmanna siam a ni,” a ti.
“Mizoram First Movement chu kohhran, sorkar hnathawk, political party hrang hrang mi leh sa te, sumdawng, kut hnathawka eizawng, zirlaite leh Mizorama pawl hrang hrang bakah mi mal lenna tur forum a nih thu a sawi bawk.
Lalnunmawia Chuaungo ram inrelbawlna kalphung hi duhkhawp lohna a lian a, tun aia tha zawka kal dan kawnga awm a ni tih ngaihdan fel leh lian tak tak nei an awm a, mi mal thahnemngaihnaa hma lak chuan awmzia a nei ngei mai. Mahse, duh angin impact a nei hleithei lo a. Chuvangin, mi tam zawk tel theihna tura forum hi din a nih thu a sawi.
MFM Vice President Lalnunkunga Sailo pawhin sorkar inrelbawl danah, contract system leh eiruk chungchangahte leh ram inrelbawl danah siamthat ngai tam tak a awm thu a sawi a. “Ram hmangaihna leh thahnemngaihna, ram siam tumna aiin mahni chhung leh khat te, party induhsaknate hi a lian ta lutuk a. Issue hrang hrang a lo awmin mi malin kan phun kan phun a, a reh leh mai a, hmasawnna leh changkanna rah chhuak turin engmah a awm thei lo a ni,” a ti.
Awmhmuna thil tha leh kalphung dikte nghah ringawt chuan engtikah mah khua a var dawn lo tih sawiin, “He Zoram khaw vartir tura thawktu kan awm a ngai a. Chutiang tur chuan Zoram mipui zawng zawngte awmhmuna lo phun lungawi mai mai thinte chu vawiinah lo tho a, rawn pen chhuaka he movemnet hi rawn zawm turin kan sawm duh a ni,” Lalnunkunga Sailo-in a ti bawk.
Assistant General Secretary: Alinery Lianhlawng chuan MFM-in a ngaih pawimawh turte chu good governance, voter’s education, environment protection, education reforms leh land reforms te a nih thu a puang a. MFM lungphum leh innghahna chu – rorelna dik leh kalphung dik tundin a nih theih nana hmalak leh kalphung dik lo dodal te, mi tha leh dik, ram hmangaihtu an lo pen chhuah a, an thawhho theihna tura kawng sial a nih thu a sawi bawk.
MFM hruaitute:
President: Lalnunmawia Chuaungo
Vice President: Lalnunkunga Sailo, Vanramchhuangi
General Secretary: Dr Rohmingmawii
Assistant General Secretary: Alinery Lianhlawng
Treasurer: Lalsangkimi Sailo
Finance Secretary: ZR Thahmingliana