Home Minister Lalchamliana chuan Aitlang, Buarchep leh Saihapui V atangin Assam police-te hnawhchhuah tum an nih thu house a hrilh.
Nimina assembly session-ah Congress member Lalrindika Ralte leh member dangte zawh belhna chhangin Lalchamliana chuan Mizoram chhung, ramri depa Assam police inkulhte hnawh chhuah tum a nih thu sawiin, sorkarin ramria police duty-te thuam tura hma a lak thu a sawi.
Lalchamliana chuan Mizoram leh Assam ramri buaina chungchang chin fel a nih theih nana sorkar hmalakna hrang hrangte sawiin, nikum July 14-a political party leh NGO aiawhte thukhawmin an rel angin, Boundary Comittee din a nih thu a sawi.
Boundary Comittee-in Mizoram tanchhan tar lanna approach paper an buatsaih pawh peih fel tawh thu leh ramri buai ching fel tura MHA-in a ruat, Manohar Parrikar Institute for Defence Studies & Analysis-te Mizoram an kal hunah pek an ni dawn tih a sawi bawk a ni.
Home minister chuan Mizoram chu district council a nih lai atang tawha ram hruaitute zawng zawngin ramri chu chin fel an duh tih sawiin, hetihlai hian Mizoram sorkarin a duh ang ngawta a chin fel theih a ni lo a, state pahnih inkar thil a nih avangin an rem tihtlan a ngai tih a sawi.
Lalchamliana chuan, “State Boundary Comittee pawhin a duh leh a beiseina chu engtik ni-ah emaw chuan hmaichhanah kan sawi ang tih a ni,” a ti a, Mizoramin ramria a pawm, Bengal Eastern Frontier Regulations (BEFR) 1875 chu an dinna a nih phawt thu leh, an inbiak dan leh boruak that dan azirin hma an la chhunzawm zel dawn tih thu a sawi bawk.