Tui hnianghnar kan neih zel theihna tur ngaihtuah a tul
Tuiah harsatna kan nei leh thin a, a ziaawm chho leh dawnin a lang bawk. Heti reng hi kan dinhmun a ni a, kan lui hnar a kang chat chho zel nia sawi a ni thin bawk nen. Tui renchem hi kumtin kan zir zel a ngai a ni ber e.
Tui pump khawl a chhiat hlek emaw, power supply lama harsatna a awm emaw avanga tui pump theih loh zeuh hian a nghawng thui thei hle tih thawktute chuan an sawi a. Hun pangngai, khawl a chhiat loh chuan Aizawl khawpui tan ni khatah tui litre maktaduai 25 atanga maktaduai 27 pump chhuah thin a ni a, tui connection neite hnenah chawhrualin ni 10 chhungin vawi khat sem thin a ni. Thla khat chhungin consumer pakhatah tui lire 7,500-8,500 vel sem chhuak thin anga chhut a ni bawk.
Hetiang hi kan dinhmun a la nih reng avangin tui lakna hi kawng dang kan zawn mai a la ngai ngei dawnin a lang a, khawpui a thang zel a, mihring kan pung chho zel bawk nen, sorkar hian ruahmanna a neih chhoh zel a tul hle mai.
Khawvel lum chho zelah hian tuiah harsatna kan tawh loh nan ruahmanna kan siam chhoh a, tui hnianghnar kan neih theih zawkna tura campaign nasat leh, tui lakna kawng dang hi kan zawng reng a nih loh chuan kan buaina ngaiah bawk hian kan buai reng ang a, sorkar hian hma thar lain, tui hnianghnar kan neih theihna kawng hi zawng zel mawlh teh se. Mamawhna a sang telh telh zel dawn si a.