South Indian filmstar lar tak Bhavana Menon chuan kum 5 chhung ngawih a chuh hnu ah ruk bo a nih thu leh mipat hmei-chhiatna lam thila khawih nawmnah a nih thu thlengin a puang chhuak.
Film 80 chuanga inlan tawh hian dam khawchhuak tura a zinkawng hrehawm leh rilrunatthlak tak a sawichhuahna ah a film chanpui thin leh filmstar lar tak ni bawk Dileep bakah a chanpui dang thenkhatte chu a nun tihrehawmtu leh thim chhah taka hruailuttute an nih thu a sawi bawk.
Side lehlam
Dileep erawh chun a puhna leh hlinna ah inhnam-hnawihna pakhatmah a neih loh thu a sawi thung. Thla thum hren a nih hnu ah bail-a chhuah niin, he thubuai hi court-ah ngaihtuah chhunzawm mek a ni.
Menon chuan, “Hmei-chhe hlim thei tak ka ni thin a, tichuan kha thil thleng vang khan ka nun a letling thawk ta mai a. Mi tam tak chuan social media-a ka nui hmel ka dah te in hmu ngei ang. Mahse maw.. ka tawrh kha a na ngawih ngawih a sin. Hremhmun atanga lo letleh ka ni,” tiin nimin khan Bangalore-ah a sawi.
Manganthlak!
“A tuartu ka ni a, ‘filmstar khawih nawmnah’ tawh ka ni. Hun rei tak, ‘Engngatinge kei kher?’ tiin zawhna ka inzawt thin. Ka inthiam lo ngawih ngawih a, ka inmawhpuh a, talchhuahna tur kawng kha ka zawng nasa hle thin,” tiin kum 5 chhung hun thim chhah tak a tawh dan a tarlang.
Nikum hmasa khan thu-buai hi court-ah ngaihtuah tan niin, ni 15 chhungzet court-ah thu zawhfiah leh a statement lak a ni a, rilruhah takin a awm. A manganna in a vawrtawp a thleng. “Hemi \um hian thil danglam a tam em em a, theihnghilh a, hmalam pan ka tum a ni. Mahse, min han zawh tak tak chinah kha chuan eng-kim ka hrechhuak thar leh. A kip a kawia ngaihtuahnaa a lo luh zut zut tawh chuan a harsa hi ka ti thin a ni,” a ti bawk.
Mangchhia a thleng
Vanduaina a tawh Ni hian Menon hi a chenna Thrissur atanga Kochi khawpui panin a kal a, a tuk maiah film dubbing ti tur a nih laiin, kawng lakah rukbo niin, mipat hmeichhiatna lam hawia khawih nawmnawh a tawkzui ta a ni.