Mizoram volleyball inelna sang ber Pro Volleyball League chu Covid 19 hrileng leh sum harsatna avanga season hnih chawlh a nih hnuah a vawi nga nan an khel leh dawn.
Thawh\anni khan pawl pahnih aiawhin LPS Vision Director Lalsawmliana Pachuau leh Mizoram Volleyball Association (MVA) Senior Vice President Dr Lalmalsawma Nghaka chuan thawk dun chhunzawm turin inremna an siam fel.
R Dengthuama Indoor Stadium, Mualpuiah May 6 a\anga 27 chhungin Pro Volleyball League vawi ngana hi buatsaih a ni dawn a. A hmaa an thawh dun tawh ang bawkin LPS Vision-in senso tumin television-a pek chhuah leh thil dangah thuneihna a chang ang.
Chiang zawkin
Tun season Pro Volleyball League ah hian mipa team panga – champion lai Chhinga Veng Spiker, Durtlang North, Hunthar, TNT leh Tuichangral an inel dawn a.
Hmeichhe inelna lamah team pali – champion lai Durtlang, Bungkawn, Bethlehem Vengthlang leh Kanan an inel bawk ang.
May 16, 2019 khan set hmasa pahnih an hloh hnuah ropui takin Chhinga Veng an kir leh a, final-ah 3-2-in Durtlang North an hneh a, a vawi khat nan an champion.
2016 khan professional zulzuia khelh Pro Volleyball \an a ni a, mipa team chauh inelin final-ah Electric Veng club Anastasia-in league-a sang ber TNT hnehin champion hmasa ber an ni a, a hnuah kum hnih a zawnin Hunthar in trophy an la ve thung.
May 15, 2019 khan rin kai leh league-a chak vek Bungkawn in hmeichhe final-ah harsatna an tawk a, inhnehtawk taka set nga an inkhelh hnuah Durtlang an champion.
Pro Volleyball-ah hmeichhe inelna vawi hnih buatsaih a ni tawh a, 2017 khan Power Department Sporting Club-in hlawhtlinna changin champion hmasa ber an ni.
MVA General Secretary C Lalrokhuma chuan 2019 hnua a vawi khat nan buatsaih leh a nih tur thu a sawi a, an thunun phak piah lamah harsatna thleng avangin kum hnih a zawnin Pro Volleyball \hulh a ni.
“2020 khan a hun pangngai anga tih leh tumna awm mahse Covid-19 leng inkhuahkhirhna avangin inkhelh theih a ni lo va. 2020-21 season-ah neih ngei tumin engkim ruahmanna a awm tawh a, mahse, hripui leng leh sum harsatna innang avangin \hulh leh a ni,” a ti.