US box office-a pahnihna hauh mek, ‘Uncharted’ film chu Vietnam-ah chhuah khap a ni ta a, China-in a ta chei bur South China tuipui map tihlan a ni chu a pawm thei lo.
Tom Holland-a channa ah hian ‘nine-dash line’ an tih mai, China-in a keipui sa hauh bur thliarkar tihlan a ni a, helai hmunah hian Vietnam pawhin neitu nihna nei tlata a inhriat vangin boruak a sosang thei hle.
Ruahman dan chuan ‘Uncharted’ film hi March 18 hian Vietnam-a tlangzarh tum a ni a, mahse an chhuah tumna ramin politics thila pawm loh leh dodal tlat a neih vangin he film hian harsatna a tâwk pang mai.
Heng Parcel leh Sparty thliarkar inchuhna hi kum tam liam ta atang daih tawha buaipui laih laih a ni a; China, Taiwan, Philippines, Vietnam, Malaysia leh Brunei te pawhin an ta hauh ve tlat bawk si avangin eng emaw hlekah boruak a rit nghal thei hle a ni.
Buaina tâwk chho zut!
Kum 2018 khan romantic comedy film, ‘Crazy Rich Asians’ ah China thununna hnuaia awm nia tarlan, South China tuipuia thliar-kar map chu designer bag pakhatah a lang tawh a, thu inchuh kal lai mek a nih vangin a lanna bik hi Vietnam-ah an cut hmasa phawt a, an en thei chauh.
A kum leh maiah DreamWorks film, ‘Abonimable’ ah helai hmun bawk hi tihlan a ni leh a, Vietnam sor-karin an rama tihchhuah a khap nghal hmiah. Heti ang deuh tho hian Netflix pawhin, ‘Pine Gap’ series-ah a paih tel tawh bawk a, thil sensitve tak a nih vangin film siamtute pawh kawng lehlam takah chuan an fimkhur pah.
It-awm tham ni tlat
South China tuipuiah hian oil leh gas hniarhnang tak a inphumru mek a, Lawng inkalpawhna pawi-mawh tak a nih bawk vangin neitu inchuhna boruak a rit fo mai. China lah hian a huam-hap a ti na tual tual bawk si a, a chuhpui ramte tan thaw a pik duh hle a ni.