Aizawl : State bank of India-in corporate social responsibility (CSR) atangin Mizoram sorkar hnenah ICU khum 50 (pakhat man Rs 72,379) a pe a. SBI aiawhin General manager Lunkim Thangboi chuan Chief secretary Renu Sharma kutah ICU khum te hi nimin khan a hlan a ni.
Chief secretary chuan sorkar aiawhin SBI chungah lawmthu a sawi a. Sorkarin hripui do kawnga hma a laknaah public sector leh private sector te nen tangtlanga, mahni theihna ang anga hripui do tlan chu lawmawm a tih thu sawiin, “Mihring mihrinnaa inhmangaihna kan lantir hi a ropuiin, nun ho a nawm phah hle a ni”, a ti.
SBI general manager pawhin COVID hripui len hnuah SBI-in hri do kawnga tangkai tur thil engemawzah Mizoram sorkar hnena an pek tawh thu a sawi a. Aizawlah leh district headquarters hrang hrang – Lunglei, Lawngtlai leh Siaha-ah te PPE full kit 1600, Ventilator 10, Serchhip hospital tan Ambulance, ZMC tan SBI Mizoram employees te thawhkhawma lei Morgue Van te, Aizawla veng hrang hrang 4 hnenah Oxygen concentrator te an pek tawh thu a sawi bawk.