United States leh European Union chuan Russia laka boruakalhthei (liquified natural gas)-a Europe a innghat lutuk tihnep deuh nan inremna lian tak an siam tih an puang.
Inremna angin US hian EU hnenah kumin kum tawp thlengin tuialhthei chi khat, LNG tia an sawi hi cubic metre tluklehdingawn 15 vel an leisak pangngai bak a pe ang.
EU hian Ukraine a rûn a hrek nan Russian boruakalhthei an hman chu an titlem dawn tih an lo sawi tawh.
Russia hi tun dinhmunah hian EU-in boruakalhthei a mamawh 40% chuang zet tumtu a ni.
Russia-a an innghah lutuk tihnepna atan hian hmun dang atanga lak luh tam leh hman nawn theih chakna (renewable energy) tam zawk siam chhuah an tum bawk.
Hun rei zawk thawhhona tura an thlirah kum 2030 vel thleng US atanga kum tin cubic metre tluklehdingawn 50 lak luh an tum a, nikum khan cubic metre tluklehdingawn 22 vel an la lut.
US President Joe Biden-a’n ni thum chhung Brussels a tlawh chhungin inremna hi siamin Zirtawpni khan an inrem thu an puang.
Biden leh European Commission President Ursula von der Leyen chuan Russia-in Ukraine a rûn chungchang sawi dunin Kyiv hi puih zui leh an tum.
“Putin-a hian Russia-in ram leilung hausakna a neih that hi a thenawmte tihthaiha vau nan a hmang,” tiin Biden-a chuan Brussels-a thuthar lakhawmtute hnenah a sawi a. “Indonaa hmanraw remchangah a hmang a ni,” a ti.
Inremna an siam thar chuan Russia-in ram danga boruakalhthei a thawn chhuah thin a nghawng dawn tih a sawi.
“Russian boruakalhthei lak tihtawp hi Europe-in a tuar thei tih ka hria a; mahse, na zawka thil kan kalpui a tul si a ni,” a ti.
President von der Leyen pawhin thian anga inena inpek chhunzawm reng chu duh mah se hmun danga kal a ngai ta tih a sawi.
Kum khata cubic metre tluklehdingawn 50 chu Russia-in Europe-a a thawn luh hmun thuma thena hmun khat vel a ni dawn tih a sawi a, Russia atanga inla hrang turin ke an pen tan tih a sawi bawk.
Russia-in Ukraine a rûn avang hian khawvel pumah energy man a san phah hle a. Covid avanga sang sa chu a san belh.
Ukraine a rûn avangin EU hian Russian boruakalhthei a lak chu kuminah hmun thuma thena hmun hniha tihtlem a tum a, ram dang atanga lak leh renewable energy hman nasat a tum a ni.
EU hian Russia atanga a lak luh thin tihtlem nan hian inrenchem pawh a kalpui a. Chhung tinin an ren chuan kuminah pawh cubic metre tluklehdingawn 15.5 vel an hum theih an ring a, ni chakna hmanga siamin cubic metre tluklehdingawn 20 vel an neih theih an inring bawk.
EU hian renewable energy hman uarin a pangngai hi kum 2030-ah chuan cubic metre tluklehdingawn 170 hum theih an tum sa a ni.