India hmarchhakte tana thil lawmawm tak sorkar laipuiiin a puang a. Home Minister Amit Shah chuan kum tam tak Nagaland, Assam leh Manipur-a dan sawi hlawh, Armed Forces (Special Powers) Act hman chu hlih a ni tawh dawn tih Ningani khan a sawi.
AFSPA hi Assam-ah chuan district 23-ah a vaiin hlih vek a ni a, district pakhatah erawh hmun \henkhatah la hman a ni ang.
Manipur-a district paruka police station 15 huam chhungah leh Nagaland-a district pasariha police station 15 huam chhungah bawk hlih a ni ang.
Shah hian Prime Minister Narendra Modi-a kaihhruai sorkar chu hetiang a nih theihna tura hma a laknaah fakin, ‘hmarchhakah venhimna dinhmun a \ha tawh a, hmasawnna chak takin a kal tawh bawk’ niin a sawi.
Heng thil a thlen theih chhan hi hel pawlte nasa taka beiha hup beh an nih avang leh inremna siampui zel an nih vang a nih thu Shah chuan a sawi a, hmarchhak chu muanawm takin a awm theih phah niin a sawi.
State pathuma APSPA hlih a nih dawn avang hian a huam chhunga awmte pawh a lawmpui thu a sawi a, tun hma zawngin heng hmunte hi hlamchhiah niin tunah erawh ‘hun thar, muanna hun, \hanna hun leh hmasawnna hun an tawng ta’ niin Shah hian a sawi.
News agency PTI-in home ministry thupuangtu sawi a tar lan dan chuan heng state pathumah hian AFSPA hi hlih vek a ni dawn lo va, hel tam zualna hmun \henkhatah chuan kalpui reng a la ni dawn tih a sawi.
Dan sawi hlawh
AFSPA hi dan sawi hlawh tak niin a hmanna lai hmunah chuan venhim hna thawktuten khawi hmunah pawh beihpui an thlakin mi man phalna nei lawk lovin mi an man thei.
Thuneihna sang tak an neih avang hian beihpui an thlaknaah chetsual palh nia ngaih theih pawh a awm nual a. Sorkarin ram buaia a puan hmuna hman niin helho beih a ngaihna hmuna hman deuh \hin a ni.
Civil mite laka he dan behchhana an chunga chet theihna pawh an nei.
Dan hi helho hmehmih nan \ha viau angin lang mah se mihring dikna chanvo humhalhtute chuan mihring dikna chanvo palzutna nasa tak a thlen niin an sawi a. AFSPA behchhan hian mihring dikna chanvo palzuttu officer-te chu an inphen theih avang leh an inphen \hin avangin civil miten an tawrh phah niin an sawi.
He dan hnuaiah hian police-te chuan sipai an ni emaw, paramilitary force emaw pawh ni se, dan ang taka khing tur chuan sorkar laipui a\anga phalna an hmuh a ngaih hmasak \hin avangin mihring dikna chanvo palzutte pawh khin an buaithlak \hin hle a ni.
Chief minister-te an lawm
Sorkar laipuiin an tana thuthar lawmawm tak a puan chu Assam, Manipur leh Nagaland chief minister theuhte chuan lawmawm an tih thu an sawi hlawm.
Assam Chief Minister Himanta Biswa Sarma chuan Twitter-ah ‘Assam hma lam huna bung thar intanna tur’ tiin a tar lang.
“State chhunga dan leh thupek kenkawhnain hma a sawn tih lantirna a ni a. Muanna a awm tawh a, hmarchhak hi than leh hmasawnna lamah a kal chak sawt sawt tawh,” a ti.
“Muanna an ring tlattu Assam mipuite vang pawh a ni a. Prime Minister Narendra Modi-a hma lam thlirna chuan hmarchhak hi India thanna tura a klawlpui pawimawhah a siam a ni,” a ti bawk.
“Tunah chuan kan state-a 60% vel chu AFSPA-in a huam tawh dawn lo a ni,” a ti.
Manipur Chief Minister N Biren Singh pawhin hun chhinchhiahtlak a nih thu leh Prime Minister Modi-a’n hmarchhaka kawng hrang hranga ‘hmasawnna leh venhimna lama hma a lakna vang’ a nih thu a sawi.
“Thutlukna thar hian Manipur-ah muanna, than duanna leh hmasawnna bul a tan thar leh dawn a ni,” tiin Singh chuan Twitter-ah a tar lang.
Singh hian Home Minister Shah chungah pawh lawm thu sawiin ‘hmarchhak puma helna a tawpa muanna leh hmasawnna a awm theih nana mi pawimawh’ a nih thu a sawi a. “Pu Amit Shah hian kan thinlungah hmun pawimawh bik a luah reng tawh ang,” a ti.
Nagaland Chief Minister Neiphiu Rio pawhin Prime Minister Modi leh Shah chungah lawm thu a sawi a. AFSPA hlihna tur thutlukna siam chu hmarchhak tana pawimawh a nih thu leh himna, than duanna leh ngialnghehna thlentu tur a nih thu a sawi.