Furpui laia Mizorama mipui harsatna thlentu tam ber chu lei min niin mi thiamten an sawi a, khaw chhunga lei min thlen fona chhan chu mihringte fimkhur tawk loh vangah an ngai a. Khuarel chhiatna vanga in chânte sorkarin a puihna a bei tham avangin building insurance tih nachang mipuiin hria se an duh.
The Zozam Times chuan khuarelna chhiatna hrang hrang thleng thin chungchangah Geology & Mining, Disaster Management & Rehabilitation leh MIRSAC hotute a bepawp a, heng department-a mi thiamte chuan mihring chenna hmunah leimin a thlen tam chhan chu hmasawnna hnathawhna tura lei khawih chet a nihin lei awm dante zirchiang loin, fimkhur lo taka lei tihchet a nih thin vang a nih thu an sawi.
Ruahtui a tlak tam deuha in bul hnaia leimin a thlen fo chhan chu tui paihna mumal siam loh vangte a nih thu an sawi a, “Kan tui thlite hi awmze nei lo in kan luantir mai mai a, hei hian lei a tihnip a, ruah baw-hawk an awm hian chung lei hnip tawh sa chu a tihmin phah thin,” an ti.
Khawpui chhunga tuihawk luankawra bawlhhlawh tang nasa tling chu ruah tui tamin a lenin sabereka khuangkaih a siam fo tih an sawi a, “In hnawlte a awm phah thin a, ruahtui a tlak tan atangin kan bul hnaia tui luan kawrte hi lo tihfai lawk a tha khawp mai, chu chuan kawr tui lian thutin harsatna a thlen thin kan pumpelh dawn a ni,” tiin an sawi.
Mizo pi leh puten thlipui lo thleng laka an chenna leh an thlam te an chân loh nan mau phul rua sei takin in chu an kilh thin a, chu chu ‘In kawl tuk’ tia sawi thin a ni tiin, “A mawlmang zawka kan ngaih kan pi leh pute khan lo inven lawk nachang an hria,” an ti a, an tih thin ang kha rem tawh lo mah se inven lawk nachang hriat a tul thu an sawi.
To haw hun hmaa in bul hnaia thingkung lian leh thing ro leh mihring leh chenna in delh chhe theite chu lo kih emaw, lo then fai lawk emaw a tul thu an sawi a, mi thiamte chuan fur laia chhiatna hrang hrang lakah hian nasa takin a lo inven theih tih an sawi a ni.
Lung tlak fona, Ngaizel kham chungchang zawhna chhangin, kuminah ringawt pawh lung tla avangin mi pahnihin nunna an chân tawh tih an sawi a, a chhehvela cheng leh hnathawkte pawhin lung tla mai thei a awm leh awm loh an en ve fo thei se an duh thu an sawi rualin sorkar lam pawhin ngaihvenin project lian tham siam thei se an duh thu an sawi.
Furpui a lo thlen hmain khua leh venga khawtlang hruaituten an huam chhungah lei che thei, lei min mai thei, lungrem nghet lote a awm leh awm loh thlithlai fo thin se an duh tih an sawi a, “Mi tinin mawhphurhna kan nei a, kan khawtlang hruaitute pawhin mipuite himna tur hian che chhuak fo thin thei se,” an ti.
DM&R hotute chuan lei min, thlipui leh thil dang chhiatna avanga in leh lo chânte tanpuina sorkarin a pek thin chu a beitham hle tih a sawi a, in chân vek hnenah tanpuina an pek chu Rs. 1,10,900 chauh a ni tih an sawi a, in tha pui pui chân tan phei chuan a beitham hle a, hemi avang hian building insurance tih nachang hriat a tul hle tih an sawi bawk.