Prime Minister Boris Johnson chuan hun rei tak tihkhawtlai tawh, India tlawh a tum chu tun kar tawp hian a tihlawhtling dawn ta a. Ram pahnihte venhimna lama an inzawmna tihngheh leh zual dan tur chu a zin chhan lian ber tur a ni.
Johnson hian Zirtawpniah Prime Minister Narendra Modi chu New Delhi-ah a kawm dawn a, ram venhimna leh sumdawnna lam an sawi dun ang.
Tun tum hi prime minister pisa a luah hnua Johnson-a’n India a tlawh vawi khatna tur niin zin a tum hmasakah Covid vangin a thulh zel a ni.
UK hian Russia-a India a innghat lutuk chu tihnep tumin Moscow-in Ukraine a rûn atang khan a la thlem ngar ngar a ni.
Thla hmasa khan Foreign Secretary Liz Truss chuan India hi a lo tlawh tawh a. An ramin na zawka Russia a hrekna turte a sawipui bakah sumdawnna, ram venhimna, energy leh ei leh in lama inpawh zawkna an neihna tur a sawipui.
Tar lan fo tawh angin India hian Russia-in February 24 atanga Ukraine a rûn hi a la sawisel miah lo va, United Nations-a demna thu pass tur vote laknaah pawh a hai.
Johnson-a hian India a châm chhunga a tlawh tur zingah Gujarat pawh telin India state lian ber pangana hi Ninganiah a tlawh dawn a. An ram leh India-a industry pawimawh leh lianten nasa zawka investment an tihna tur a puan beisei a ni a. Science, hriselna leh technology lama thawhhona tur thar pawh a puan beisei a ni bawk.
India a tlawh tur chungchangah hian Prime Minister Johnson chuan, “Mahni thua rorel ramin muanna leh inlungrualna kan neih an beih mek lai hian mipui rorelna leh thian thate kan tanrual hun a ni.
“India hi eibar lama thiltithei leh khawvela mipui rorelna ram lian ber a nih angin, tun ang huna UK thian tha a ni hi a hlu.
“India ka tlawh tur hian ram pahniha mipuite tan thil tha tak tak a hrin chhuah a beiseiawm a. Hna thar siam, eibar dinhmuna thanna leh venhimna lama nghehna a thlen a beiseiawm,” a ti.