Aizawl: India ram zalenna kum 75-na lawmna, Azadi Ka Amrit Mahotsav lawmna denchhenin hmarchhak state-te lirthei ke hnih neia fan kualna, ‘North East on Wheels’ chu Mizoramah pawh tluang taka zawh fel a ni.
Bikers Expedition-a rawn tel Mizoram bikah hian Saza/Serow member 20-te chuan April 13, 2022 khan Damcherra, Tripura atangin Mizoram lo lutin, ni thum chhungin Mizoram hmun hrang hrang an tlawh a ni.
Mizoram an lo luh hian Mamit DFP Jenny Sailo chuan chhun chaw a lo buatsaihsak hnuah, Lengte pengah Tourism leh Sports Minister Robert Romawia Royte hian lo dawngsawngin, a ho hian bikers leh local pilot ten Raj Bhavan-ah Mizoram Larsap Dr Hari Babu Kambhampati-a’n thingpui ruai lo buatsaihsakin, Bikers Expedition khuhhawnna neih nghal a ni.
Beraw Tlang cultural program buatsaihah Dr. Vanlalthlana, MLA chu khuallian a ni a, bikers leh phai atanga media lo kal te hnenah Mizoram hmun nuam leh mawi tak takte hmuhpui tura an lo kal thei chu lawmawm a tih thu a sawi a. Mizoram Youth Commission (MYC) Chairman Dr Vanlaltanpuia, MLA pawhin Thenzawl-a Musical Night buatsaihah khuallian niin a hmanpui bawk.
April 15 khan Mizoram hmun hrang hrang tlawha lo zin te hian Thenzawl chhuahsanin, Vairengte CIJW hmunah farewell programme an hman hnuah Mizoram an chhuahsan a ni.
‘North East on Wheels’ a lo tel te hi Mizoram chhunga an kal kualnaah BAT Inc., Lushai Hills leh hmeichhe rider pathumte’n an tawiawm a. Hei bakh hian, bikers te hi national media leh Netflix te’n an tawiawm bawk.
Mizoram hmun mawi leh hnam nunphung leh ziate khawvel hriata pholan anih theihna tura hma la tute zawng zawng chhungah Namaste Foundation Chairman
Atul Kulkarni IIM, BDG chuan lawmthu a sawi a. North East on Wheels buaipuitute pawhin an programme a hlawhtlin theihna tura pawl leh mi mal anga lo buaipuitute zawng zawng chungah lawmthu an sawi bawk a ni.