Mipuiten an duh loh rawn mek, Sri Lankan President Gotabaya Rajapaksa chuan an ram eibar dinhmun chhe lutuk avanga bâng tura nasa taka an nawr mek laiin an a cabinet thar a ruat.
Minister thar 17 zingah hian a hmaa chanvo lian tak tak changtu ama chhungkhatte chu an tel lo vek tawh a, a thuihhruai lawk zual erawh chuan hmun an chang thung.
Rajapaksa hian a hmain eptute chu tangruala sorkar intawm siampuiah a lo sawm tawh a; mahse, eptute hian an hnawl.
Thliarkar ram hian kum 1948-a Britain atanga an indan hnua eibar dinhmun chhiat lai ber an tawng mek.
An ramin foreign currency an tlachham a, ram dang atangin ei tur leh tuialhthei an lak luh theih loh phah a, indaih lohna nasa tak leh a man tona nasa tak a thlen phah.
Power pawh nileng deuhthawa awm loh te, ei tur, damdawi leh tuialhthei lei tur awm lote chuan mipui thin a tiur hle a ni.
Kar hmasa khan Sri Lanka hian ram danga an bat an pe thei lo tih a puang bawk a. Thawhtanni kha an ba pek hun a ni a, hemi ni vek hian International Monetary Fund hnenah chhan chhuak tura puhna an thlen.
Stock exchange pawh Thawhtanni atang vek khan chawlhkar khat chhung khar lailawk tan a ni.
April thla tir atang khan mipuite chuan President Rajapaksa hi bâng tura nawrna an lo lantir tan tawh a. A cabinet-ten an bânsan vek hnuah pawh a bâng ve duh lo va, eptute pawhin mipui mit a tlung zo ngang tawh lo niin an sawi.
Cabinet thar a ruat leh tak bawk si avangin amah duh lotute duh ang chu a tihhlawhtlin loh hmel zual hle.
Cabinet thar a ruat hma lawk hian chanchinbu thenkhat chuan amah duh lova an ram khawpui bera pungkhawmte chu a sorkar chuan ‘vaukama intawllen’ niin a sawi tih an tar lang a, firfiak pawlin an pui niin a sawi bawk nia tar lan a ni a. Colombo-a Galle Face Green-a amah duh lova awmkhawmte hian mi sang tel an hip khawm tawh a ni.
Mipuiten amah duh lohna an lantir tirh khan Rajapaksa hian emergency puangin curfew hmanga tihtawp a tum a, social media eng emaw zat a titawp bawk.
Heng khapna hian mipui a dan zawh chuan loh avangin a hnu lawkah hrekna hi a hlip thung.
Amah leh a u, a cabinet zinga bâng ve lo, Prime Minister Mahinda Rajapaksa te chuan mipuite hi hmin tumin an bei nasa a; mahse, president bang tura tihna au thawm a la ring zawk tho va. Mahinda hi cabinet tharah pawh a la tel.
Kum 2019 inthlanah khan mipuiten Rajapaksa hi hneh taka thlang tlingin an ram sawh ngheha ram chak taka siam a tum thu a sawi thin a; mahse, tunah hian mipui duhna chu a tlahniam tawh hle.
Rajapaksa sawiseltute chuan ei rukna leh chhungte induhsakna a nasa lutuk tih an sawi thin a. Ministry pawimawh apiang chu a unaute leh a unau fate a chelhtir a, hei hi an buaina chhan lian ber pakhat niin an sawi.