Delhi-a Jahangirpuri venga sakhaw thil tihnaah sakhaw dang nena intihbuaina liantham tak a chhuak zui a. Lehlam lehlam an thinrimin an inpuh tawn nasa hle.
Buaina chhuak hi Inrinnia mi tawh kha a ni a, mi pakua vel hliam tuar awmin pasarih chu police an ni a. Police pakhat hi silaia kah a ni nghe nghe.
Mi rethei, a tam zawk Bengali tawng hmang Muslim tam zawk chenna vengah hian Thawhtanni thleng khan boruak a la \ang hle.
Thil thleng hmutute chuan mi za chuang, Hindu pawl lian taka member eng emaw zat pawh telnain Hindu pathian, Hanuman-a piancham pualin kawng an zawh laia thleng niin an sawi. Video-a a lan dan chuan an lâm a, sakhaw thil lam sawiin an au rual bawk a, thenkhat chuan nghunhnam leh hmanraw dang an keng.
Kawng zawhtuten mosque an kal pelh laiin buaina hi a chhuak ta a. Lung vawm a ni a, tharum thawhna nasa tak a thleng zui ta a ni.
Lehlam lehlam hian buaina siam hmasatuah an inpuh tawn a. Kawng zawhtute chuan Muslim-ten in chung atangin lung leh thil hriam dangin an vawm hmasa niin an sawi.
Muslim-te erawh chuan Hindu-te hi mosque bulah hian ngeiawm taka auvin an tihel niin an sawi a, an inhnial buai zui a. Lung thawhtu hmasa pawh lehlam niin an sawi.
Delhi police chuan mi 23 an man tawh a, an zingah kumtlinglo pahnih an tel a. Crime branch chuan buaina chhuah tan dan an la chhui zui mek a, tual chhunga BJP hruaituten buaina phenah hian ‘dan lova Bangladesh atanga pem lutte’ an inrawlh nia an sawi pawh an chhui zui mek.
Tun tuma Delhi-a buaina chhuak hi 2020 riots an tih mai, mi 50 chuang thihna a thlen hnua lian ber a la ni a. Hemi tuma thi tam zawk hi Muslim an ni a. India hmar lama Madhya Pradesh leh Rajasthan-a tun hnaia buaina ang deuh bawk a ni.
State pahnih danga buaina pawh hi sakhaw thiltihna tho atanga intan niin mosque kianga Ram Navami kût hmanna atangin a ni.
Jahangirpuri-a thil a thlen hnuah hian eptu party 13 chuan thuchhuah intawm an siam nghal a, Prime Minister Narendra Modi a ngawi tlat chu mak an tih thu an sawi.
India ramah hian kum 2014-a Hindu kulmuk, Modi-a kaihhruai BJP a sorkar hnuah he sakhaw chawi lar tumna hi a tam sawt hle a. Sakhaw kûtpui hmante chu sakhaw dang nena intihbuaina chhuah tam hun lai a ni zel.
Thusawi inang lo
Jahangirpuri-a chengte chuan tun anga sakhaw thil avanga buaina hi an venga a vawi khat chhuahna nia an hriat thu an sawi a. Hetih lai hian an venga Hindu tam takte chuan an sakhaw thil an tih laiin tihbuai nia insawiin an thinrim hle.
Inrinni kawng zawh huaihawitu, an venga Hanuman temple epa thukhawm zinga pakhat, Sukhen Sarkar chuan, “Hmanrua pawh kan keng lo va, insual buaina lam rilru pawh kan pu lo. Lung leh darthlalang keh them rawn surin min rawn fuh ta ringawt a ni,” tiin ani hian ke-a hliam kak a nei.
Kawng zawhnaa tel ve dang, Gaurishankar Gupta chuan, “Ruahman lawka thilti an ni a. Min hual vek a, lung, ngunhnam leh chemtein min rawn bei a ni,” tiin thinrim takin a sawi.
Hindu-te hian anmahni beitute hian petrol bomb leh pistol an hman bakah lirtheia hmanraw awmte an la niin an sawi bawk.
Hindu-ho thutkhawmna atanga hla vak lo mosque bulah Muslim-ho an awm khawm ve bawk a, anni pawhin a ti hmasatuah Hindu-te an puh.
Mosque manager Mohammed Salahuddin chuan kawng zawhtuten lunga an awm hnuah chauh Muslim-te chuan an chhang let ve niin a sawi.
“Kan miten mosque beih a ni tih an han hmuh khan an insum thei ta bik lo a ni,” a ti.
Mosque chung atanga lunga vawm nia lehlamin an puhna chu a pha bawk.
Tual chhunga BJP hruaitute chuan Jahangirpuri-a cheng tam zawk hi dan lova Bangladesh atanga lutte an nih thu tun hma atangin an lo sawi tawh thin.
Muslim-te erawh chuan phain West Bengal, Uttar Pradesh leh Bihar atanga pem an nih thu leh a tam zawk hi ni tin inhlawh leh eizawnna tenau tete buaipui an nih thu an sawi thung.
“Kan lehkha neihte pawh in endik thei ang,” tiin a mi cheng pakhat, Sazda chuan a sawi a. Muslim-te chu chanchinbuten dik lo taka an chhuah thin avangin mi sual angin an hmu mai niin a sawi.