Aizawl : Falkawn-a Zoram Medical College (ZMC) tihchangtlunna tur leh hmasawnna ruhrel thawh mek hrang hrangte tlawhin Health Minister Dr R. Lalthangliana’n a enfiah.
Health Minister hian cheng vaibelchhe 103.41 senga Academic Block (New Teaching Block) building sak mek a tlawh a. He building hi M/S MP Khaitan te’n August 8, 2018 atanga an sak tan tawh a ni a, tunah hian floor thenkhat luah tawh niin June 6, 2022 a luah kim hman tura beisei a ni.
Dr R Lalthangliana hian ZMC-a OPD building block thar sak mek te, Medical Superintendent pisa sak zawh thar te, Neo-natal ICU leh Pediatric ICU bakah Operation Theatre te leh Indian Medical Association (IMA) building sak mek a tlawh bawk.
IMA building bikah hian Guest Room, Conference Hall, Cabin leh Vehicle Parking Lot awm tura ruahman niin, IMA member daktawr te’n an pawisa an thawhkhawm atanga sak a ni a. Minister hian room hrang hrang luah theih mai tura duante fangin, building sak dan leh hmun hmate a enfiah a ni.
Health Minister hi R. Lalramnghaka IAS, Health Secretary; Dr. F. Lallianhlira, Principal Director leh Er. H. Lalfakzuala EE, Health te’n an tawiawm a, ZMC-a thawktute’n an lo dawngsawng.