France rama league champion nih inumnaah Paris St-Germain in hma an hruai fal chhunzawm a. Record dinglai tluk tura a vawi 10-na a champion nih an hnaih.
Pathianni zan inkhelah Le Classique-ah anmahni umtu ber Olympique Marseille nen an inkhel a. Neymar leh Kylian Mbappe te chuan goal khungin 2-1 in hnehna an chang.
Parc des Princes-ah Mauricio Pochettino pawlten nung taka bul tanin Neymar-a’n goal a khung thuai a, hei hi minute 31-naah Duje Caleta Car chuan Marseille tan a sut.
Halftime dawnah goal nawr hnem zawk PSG in a rah an seng a, Valentin Rongier handball avangin penalty an hmu a, Mbappe-a’n tun season a a league goal 21-na turin goal-h a khung.
Inkhel boruak sang takah hian PSG in second half-ah goal khat pawm loh an nei leh bawk.
PSG hi thla hmasa a UEFA Champions League atanga an tlak avangin an fans te an la lungawi lova, inkhelah pawh thawm an nei tha lo hle.
Captain Marquinhos chuan, “Kan boruak kha ka beisei miah loh thil a ni. Kan inkhel ang boruak sang atan hi chuan thildang dahthat a, thlawpna nasa tak hi kan mamawh ve a. An rilru kan hrethiam chungin vawiin kha chu a hun lo.” a ti.