- Debbie Rinawmi
Engkim hian nghawng tha leh tha lo a nei a, kan thlir dan leh rilru put danah thui tak a innghat a, chuvangin kan rilru put hmang hi a pawimawh hle a ni. Thihna chungchanga kan ngaihdan pawh hi a inang lo thei hle a. Thihna kan dawnsawn danin kan hma lam hun thui takin a hril kan ti thei ang. Kan sakhuana te, khawtlang leh mimal te hi thihna kan dawnsawn danah thuk tak an innghat a ni ti ila kan sawi sual awm lo ve. Thihna hian a tha zawng leh tha lo zawngin mihring ah nghawng a nei thei a.
THIHNA IN A THA ZAWNGA NGHAWNG A NEIH DAN
Thihna in a tha zawnga nghawng a neih dan hi chi hnih in a sawi theih a. Kristian sakhua chuan Krista ah chuan thil thleng engkim ah beiseina a pe a. Thihna chungchang ah pawh hian Kristian te rin dan ah chuan nunna kan chan theih nana kailawn chauh a ni a. Thih hnu khawvel hi kan beisei ber a nih avangin Kristian te tan chuan thihna hi malsawmna ti te pawhin a sawi theih thin a ni. Kristian hla tam tak ah pawh khawvel hrehawm thu leh vanram nghahhlelhawm thu a tam em em a, ‘thih thlamuanna’ tih tawngkam te pawh hi beiseina kan neih nen hian inkungkaihna thuk tak a nei a ni. Hemi ngaihdan atang hi chuan a thi hmasa te hi ‘vannei’ tia sawi thin an ni a; thenkhat chuan mitthi vui naah kawr var in an inthuam thin a ni. Rawng var chuan ‘beiseina’ a entir a, kal ta te an lawmpui zia entirna te pawh a ni ang chu.
Sakhuana hi kan ngaihdan siamna pakhat a tih theih awm e. Rin dan pakhat ah chuan mihring te chuan Pathianin harsatna hmangin a ko a, a pawt hnai thin tih a ni. Mi thenkhat chuan thihna avanga chhungte emaw an hmangaih te an chan hian Pathian hnaih phah nan an hmang thin a, Kristian te thlirna atang chuan hlawk tak leh malsawmna nasa tak a ni thin. Nu leh pa chan avanga thilsual tih sim ta sawi tur an awm a, thihna avanga chhungkua inrem sawt te pawh an awm ve bawk a ni.
Thihna avang hian thu leh hla a piang nasa em em a. A phuahtu te chauh hlawkna tel an ni lo va, chung thu/hla te chu thihna avanga lusun khawhar te’n an lo hmuhin an tawn ang tawng an awm ve a ni tih an hriat phah a. A rilru khawharna ang taka puanchhuahna a nih lek phei chuan an hahdam huai huai a, an rilru ipikna te pawh a thawl hawk thin. Rawngbawlna a hring chhuak ti te pawhin sawi ila, a sual kher awm lo ve. Thihna avanga tawrhna thlen lai hi mihring rilru no lai a ni a, heng hun hi Kristian te tan chuan Pathian thu inhrilh hun tak a ni, Pathian ram zauh nana tangkai tak pawh a ni. Thihna hi tu tan pawh a na a, chu tih rual chuan a eng zawnga thlir thin mi tan chuan harsat ber na hmun ah pawh hlawkna a awm thin a ni.
THIHNA IN A THA LO ZAWNGA NGHAWNG A NEIH DAN
Thihna hi mihring tan chuan a tawp chian em avangin tawrh dan thiam a har a, a na em em a ni. Hlawm khat lian deuhin dah ta ila. A hmasa berah chuan rilru leh thlarau a nghawng na em em a. Thinlung a ipik a, thlarau a nguaiin a zuai a. Dam chhan nei tawh lo va inhriatna chuan khawvel ho tih na a tuh a. Chu chuan taksa leh nitin nunphungah nghawng tha lo a nei thin a ni. Heng rilru lam natna hi a nasat chuan nitin nunphung, hnathawh leh hriselna thlengin a nghawng a, mihring tan a hlauhawm thei a ni. Taksa leh thlarau hi thil inzawm tlat a nih avangin rilru dam lohna hian taksa a nghawng a; taksa dam lohna pawhin thlarau nguina a thlen thin a ni.
Hri leng (Covid-19) avangin thihna a thleng nasa em em a, chuvangin hmun tinah mi an chi ai a. Rilru lamah dam lohna a thleng nasa em em a. Chhungkaw thenkhat ah phei chuan mi 2/3 lai thihna a thleng a, chung chhungkua ah chuan chhungte la dama te pawhin hnualna leh beidawnna an hmachhawn a, an thlarau a chau em em thin a ni.
Thihna hi Pathian siam a ni a, mihring te tawrh zawh tura siam a ni. Rilru emaw taksa emaw pawh ni se, chak zawng leh theih chin chu a danglam ngei mai; amaherawhchu, Kristian te chuan sakhaw dang neih ve loh ‘beiseina’ kan nei a. Midang tluk chhiatna leh beidawnna ah pawh kan tho leh a, beiseina kan nei thin. Thihna hi a lungchhiat thlak a, a lunglen thlak bawk a; mahse, Kristian te chuan Krista zarah chu lungngaihna phena lawmna chu an beisei zawk thin a ni.