Thenzawla ‘Thing Ruahsur’ tia sawi chu zirchian a nih hnuah he thing hi sapin Bromme Raintree an tih, a scientific name ‘Albizia lebbeck’ a ni tih finfiah a ni.
Tun hnaia Thenzawl Vengthara thingkung pakhat atangin zan 20 chhung vel zet zantin ruah bing tlem sur angin tui a sur thin a. Hemi chungchang zirchiang tur hian April 16, 2022 khan Mizoram University leh Pachhunga University College atangin mi thiamte kalin an zirchiang a. Thing Ruahsur tia sawi hi Bromme Raintree tia sn awi, a scientific name ‘Albizia lebbeck’ a ni tih fin fiah a ni a. He thing kung awmnaa lei (soil) chu laboratory-a enfiah tura lak niin, thing hnah pawh zirchian (herbarium – tih ro a, sawngbawl a, dah that) tura hawn ni bawkin, zirchianna neih chhunzawm la tum a ni.
Hetih lai hian, thing ruahsur hi ni li vel kalta atang khan a reh tawh avangin MZU leh PUC atanga mi thiam kalte hian a tui sample lak an tum chu an la thei lo a, he thing hi a sur leh a nih chuan rang taka a tui lak ngei mi thiamte hian an tum thu an sawi bawk.
Thing ruahsur zirchianna nei tur hian MZU Geography Department-a Assistant Professor Dr KC Malsawmzuava; PUC Chemistry Department-a Assistant Professor Dr. K. Vanlaldinpuia; MZU Department of Botany-a Research Scholar Dr. Elizabeth Vanlalruati; MZU Engineering Department atangin Er. Lalchhanhima, Er. Vanlalhruaia leh Er. Laldintluanga bakah MZU Department of History-a Assistant Professor Dr. Laithangpuii te chu thing kung zirchiang tur hian an kal a. Thenzawl Vengthar VC-ten an lo dawngsawng a ni.
Thenzawla Vantawng Editor Liantluanga Renthlei hnen atanga thudawn danin, he thing atang hian ruah bing sur ang maia awm thin hi zanah chauh sur thinin, kar hnih vel a sur hnuah, mipui nawlpuiin an hre tan a, tual chhung leh hmun dang atang pawhin tlawhtu an thahnem hman hle. Mipui nawlpuiin an hriat atanga zan ruk chhung vel chu sur chhunzawmin, mi tam takin an tlawh hnu, chawlhkar kalta Nilai zan vel atang khan he thing ruahbing sur hi a han ta a ni.