Aizawl: Nimin khan Mizoram Industry Owners’ Association (MIOA) hruaitute an president, F Rodingliana ina thukhawm chuan industrial area hrang hranga industry neitute hi an chep tak hle thu an sawi a. Dan loa industry rama inbengbel tumte leh industry din tum lo a, thuneitute kaltlanga ram hauh ringawtte an ngaimawh thu an sawi.
Sorkar hna thlir mai loa Mizo thalaiten industry dina eizawnna ngialnghet nei tura hma an lak ve theih nan Industry Department-in tuna ram la awm chhunte hi tun aia khauh zawka humhalh turin hma la tur ngen nise tiin MIOA hruaitu thukhawmin an rel.
MIOA hruaitute chuan hun rei tak atanga an lo nawr tawh, hnam dang Company ISPAT hnena sorkarin kum 99 allotment a pek ang hian a ram leilung fate hi a pek ve theih nan chak zawka nawr nise an ti bawk.
Industrial area chhunga industry neituten Aizawl Municipal Corporation (AMC) hnena property tax chhun luh chungchangah hriatthiam loh an neih avangin ngun zawka zirchianna neih a, kum tin sorkarah allotment fee an chawitir hnuah AMC-ah property tax pek leh hi an tih tur a ni em tih thlenga dan hre mite rawn phawt nise tiin, “State dangah pawh industrial area-ah property tax hi chawi loh niin kan hria a, sorkarah kan thu hi thlen phawt nise kan ti,” tia relin, an member-te pawh MIOA-in thu chiang a hriat hma chu property tax pe rih lo turin an ngen nghal bawk.