India cricket thuneitu Board of Control for Cricket in India hnuaia Senior Selection Committee chuan National Cricket Academy a training camp an buatsaih a tel turin Mizo cricketer Joseph Lalthankhuma chu an thlang.
Ramhlun Venglai player Joseph-a hian Pathianni, April 17 khan Bangalore a M. Chinnaswamy Stadium a training camp an buatsaih tur hi a zawm tawh a. Thawhtanni atang khan camp hi an tan a, May 12 thleng neih a ni ang.
Tun camp-ah hian BCCI hnuaia inelna a Plate Group atanga inel state hrang hrangte zinga che tha te thlanchhuah an ni.
Joseph-a chuan, “A tir lam chauh a la ni a, hautak zawka training an la kalpui chiah lova, mahse a ni chho thuai ang. Batting, bowling leh fielding coach ten min vil a, bowling-ah pawh pace leh spin coach an awm hrang a. Batting lam thlurbing ka tum laiin bowling coach in a hnenah in report turin min ti a, min vawm tir ve nghal mai.” tiin training chungchang a sawi a.
“Keimahni zirchian nan assessment uluk tak an nei a, kan inkhelh thin dante leh he camp atang hian eng nge zirchhuah kan duh pathum min zawt vek bawk.” a ti bawk.
Under-19 ah pathum
All India Junior Selection Committee chuan May 9 atanga NCA ah bawk kalpui tur NCA Under-19 Boys camp a tel turin Mizoram cricketer pathum an thlang.
Bangalore a camp-ah hian K. Vanrotlinga, Ramhlun Venglai, Sahil Sharma, Thuampui leh Malsawmtluanga, Hunthar Veng te tel tura ko an ni a. May 9 atanga June ni 2 thleng camp hi neih a ni ang.
NCA a camp nei tur cricketer pathumte zingah hian pahnih – K. Vanrotlinga leh Sahil Sharma te hi Col. C K Nayudu Trophy-ah Mizoram Under 25 team tan an khel mek.