Indian Premier League franchise Rajasthan Royals chuan tun IPL 2022 kal laia an net bowler ni turin Mizo bowler Remruatdika Ralte chu an la.
Ramhlun Venglai a cheng Remruatdika hi Mizoram senior team tan inelna format hrang hranga khel tawh a ni a. Nikum December 8 a Mizoram in Vijay Hazare Trophy a team tha zawka ngaih Bihar an hneh tumin wicket 5 a la.
Zirtawpni hian IPL khelhna hmun Mumbai lam a pan ang a. Hun engemaw chen a in khunghran hnuah Rajasthan Royals hi a zawm ang.
“Hun engemaw chen atang khan inbiakna chu a awm tawh a, Vijay Hazare Trophy kan khelh zawh atang khan Rajasthan Royals sawi thawm hi chu a awm tawh. Mahse an reh leh deuh hnuah tun kartawp khan an rawn ti chiang ta a ni.” tiin Remruatdika chuan The Zozam Times a hrilh.
Eng nge net bowler chu?
Cricket team in inelna lian a hmachhawn dawnin inkhel tur squad an nei a, heng zinga player-te bakah hian team tana pawimawh tak an awm a, chu chu net bowler-te an ni.
Inelna lian an hmachhawn dawnin batsman-ten an hriam zawk nan practice tam an mamawh thin a, bowler hrang hrang an hmachhawn a ngai thin. Hetianga practice-naah erawh squad pangngai a bowler te tan ball vawm tam a tha ber lova, an taksa an khek a tul thin. Hei vang hian team hrang hrangten net bowler an nei thin a ni.
Net bowler te hi a tlangpuiin player naupang zawk leh tawnhriat la nei tam lo zawkte an ni thin a, player hmabak nei enga ngaih an ni thin. An tan an team a batsman tha rual hmachhawn kha tawnhriat hlu tak a tling a, IPL team te hian hamthatna pek an nei ve bawk.