Hripuiin khawvel a nuan tantir 2020 kha chuan nasa takin subcriber an pung kha a ni a, tunah erawh Netflix tan mangchhia an tam chho ta. Ni 100 liam ta chhung khan subscriber nuai 2 an hloh.
Kum sawm kalta chhunga subscriber an hloh vawikhatna hi a tawp mai dawn niin a lang lo lehnghal a, tun atanga thla tam vak lovah subscriber maktaduai 2 velin an chhuahsan tura ngaih a ni bawk.
Khawvela streaming lian ber hian thawhlehni khan an dinhmun dik tak puanchhuahna an nei a, kumin quarter khatna (January – March) khan subscriber nuai 2 an hloh a, quarter hnihna (April-June) hian maktaduai hnih velin an bansan tura beisei niin, heti tak maia pawttu an hlohna chhan hrang hrang zingah chhungkaw khat mai ni lo, midang hnena password sharing a tam lutuk vang niah an ngai.
Awlsam leh man man taka broadand internet service chak leh tha tak a pun hluai bakah smart TV te ban phak maia a lo awm tak bawk si avangin duhthlan tur a tam a, chutih lai kara password sharing pung chak lutuk chu hmeh hmih thuai dan ngaihtuah reng a ngai bawk ang.
Netflix hian Apple leh Disney vung chho mup mup zel hi a beng dai mai mai thei tawh si lova, lehlamah Amazon Prime Video leh streaming tha tak tak an ding fer fur bawk nen, khua a var tak tak thei dawn lo ni te pawhin a lang.
Mahse, heti chung hian Netflix hian khawvela streamer lian ber a ni tho a, tunah hian subscriber maktaduai 222 velin an thutchilh reng tho.
Kumin first quarter chhung khan US leh Canada-ah susbcriber 600,000 an hloh tawh tih an sawi rualin, Indian customer dinhmun erawh report-ah tarlan a ni lo.