Aizawl : MNF flagship programme SEDP kalpuina turah hmeithai leh pachhiate ngaih pawimawh an nih tur thu Tuivawl bialtu MLA Lalchhandama Ralte-in a sawi.
A bial tlawh chhuah programme a hman meka Block Resource Centre, Darlawna mi thar lawmluh programme nimina buatsaihah Lalchhandama Ralte hian thu sawiin, SEDP hi hripui vanga duh anga hmalakna kalpui theih loh a nih hnuah mipui thleng phaka kalpui tan thei a ni ta chu lawmawm a tih thu a sawi a. “SEDP kalpui dan tur chungchangah kan party mite ka ngen duh che u chu, he programme kan kalpuina turah hian hmeithai leh pachhiate hi i ngai pawimawh hmasa ang u,” a ti.
Tuivawl bialtu MLA hian, “Kan elpui ber pahnihte hi mipui rilruah an tlahniam zel a. Congress party chuan thahrui an lakna ber Delhi lam a tlabal zo tawh a, thahrui an nei thei tawh lo a. An tan thawhleh ngaihna a awm rih lo a. ZPM hian MADC bial 25-ah bial pariat chiah an chuh ve ngam a, hei hian ZPM sum tetzia a lan tir a, Pathian belruat an ni rih lo an ni ang,” tiin; kum 2023 inthlanpui lo awm leh turah MNF an sorkar leh ngei tur thu a sawi.
Darlawn MNF Group buatsaih mi thar lawmluh programme a hmanpuinaah bialtu MLA hian MNF party zawm thar mi eng emaw zat a lawm lut a ni.