Premier League hmahruaitu ni turin Manchester City chu table chung berah an kir leh a. Liverpool in tunkar inkhelah an khum zuai hnuah an tih tur Premier League champion in an hlen a. Brighton & Hove Albion lakah 3-0 in hnehna an chang.
Etihad Stadium a Nilaini zana inkhelah Graham Potter-a pawlte hian first half-ah goal an khung thei lova. Second half-ah erawh inkhel thlak danglam turin Kevin de Bruyne a inlar a. Minute 53-naah Riyad Mahrez-a goal khung tur a siamsak a. Huntawp hma minute 8 a la awmin Bernardo Silva goal khung tur thiam takin ball a pe bawk.
Goal lut pahnih inkarah Phil Foden chuan Man City goal hnihna a khung a, England midfielder goal shoot hi dan pial niin Brighton goal-ah a lut.
An chunga Liverpool awm chunga inkhel an tan avangin Etihad Boruak a rit hman hle a, mahse second half-ah an mamawh goal ang an khung hnuah erawh City boruak a nung. Champion tur erawhin kalkawng a la thui a, match ruk an hmabakah chetsual an tan a thiang lo.
Man City boss Pep Guardiola chuan hmabak a thlir thui duh lova, “Vawiina kan lawmna chu Champions League khel turin chhiarkawp danah kan tlingah kan inngai. Hei hi mi tam takin thil lian thamah ngai lo mahse Champions League khelh tum team te kan thlir hian a namai lo hle.”
“Premier League-ah chuan point hnihin hlohin Liverpool an champion a ni mai a, kan chak vek a ngai tih kan hria. Inkhel a hautak dawn a, mahse vawiin anga kan khelh zel a ngai ang. Kan hlawhtlin chuan kan lawm anga, a nih loh chuan Liverpool kan lawmpui mai ang.” a ti.
Gunners an chak
Champions League khelpha tura Arsenal beihna chu a nung thar leh a. A zawna vawi thum an tlawm hnuah Chelsea-ah 4-2 in Gunners in hnehna an chang.
First half inkhel a hmuhnawm a, team pahnihte goal-ah ball a tam.
Alexandre Lacazette aia thlan Eddie Nketiah chuan a manager rinna rul letin goal hmahruai a khung a. Minute 17-naah hei hi Timo Werner chuan Chelsea tan a sut.
Emile Smith Rowe-a’n Gunners hmahruai pui lehin hei hi Blues captain Cesar Azpilicueta chuan a sut a. Second half-ah erawh Blues tlarhnung pherh chu Nketiah bawkin remchangah la in goal a khung a. Bukayo Saka chuan an goal hnuhnung ber a khung leh bawk.
Gunners hian palina a awm an hmelma Tottenham Hotspur nen point inang an nei mek a, Emirates Stadium-ah anni pahnih hian North London Derby an la khel dawn.