ULFA (I) chuan nimin khan ONGC-a thawk an ruk bo, Ritul Saikia chu nimin khan an chhuah ta.
Saikia hi India-Myanmar ramri, Nagaland-a Mon district chhung, Changsa Basti-ah an chhuah nia sawi a ni.
April 21 khan ONGC-a thawk mi pathum chu ULFA(I) hel pawla mite hian ONGC leh Romanian lam company nena Lakwa, Sivasagar district, Assam-a hna an thawhna hmun atangin an ru bo.
Ruk bo zinga pahnih, Mohini Mohan Gogoi leh Alakesh Saikia chu Indian Army leh Nagaland police tangkawpin beihpui an thlak dunnaah Mon district-a khaw pakhat atangin an chhanchhuak a. Saikia hi an chhan ve thei lo.
Assam Chief Minister Himanta Biswa Sarma chuan tun hnaiah Jorhat district-a Titabor-a an inah Saikia chhungte hi a hmu nghe nghe.
Chief minister hian a chhungte hnenah sorkarin chhanchhuak turin hma a la reng tih a hrilh a. Helho hnen atanga an hriat dan chuan Saikia hi Myanmar ram chhungah kawlin a hriselna pawh a tha nia an sawi thu a hrilh bawk.
Hetih lai hian ULFA(I) commander-in-chief Paresh Baruah chuan Saikia hi an pawlin kawlin an chhuah tep tih a sawi bawk.