Rocking star, Yash channa, ‘KGF 2’ Hindi chuan sum leh pai a rut chhuak nawlh nawlh reng mai a, tlangzarh atanga chawlhkar khat lek chhungin Rs vaibelchhe 250 a lalut. Heti ang hi India film industry-ah a la thleng ngai lo.
‘KGF 2’ Hindi hian ‘Baahubali’ – The Conclusion’ record siam tawh a thaichhe chiang hle, tihna a ni a. Baahubali khan karkhat chhung lekin Rs vaibelchhe 246.50 a hmu chhuak.
Bollywood-ah hian South India film te’n thawm an nei ring tial tial a, Hindi version-a siam te thlengin lal ram an zauh tual tual. Mainstream Hindi film te lar hat hat thin mah se, record siam leh sum lakluh kawngah South India te’n an vung zawk ta hle.
‘KGF 2’ hi Kannada film siam tawh azawnga senso hautak ber niin, film puitlin nan Rs vaibelchhe 100 vel zet sen ral a ni. Bollywood lam atangin Sanjay Dutt leh Ravenna Tandon a inlan. Dutt hi Kannada film-a a vawikhat inlanna a ni nghe nghe.