An striker tun season a che tha tak Karim Benzema penalty pet chu vawi hnih lai goalkeeper Sergio Herrera chuan dansak mahse Real Madrid dan theih tak tak an ni lova. 3-1 in Osasuna lakah Los Blancos an chak a, La Liga title chawi turin an dinhmun a tha tawh hle.
Pamplona a Osasuna khelmual Estadio El Sadar ah Real tan David Alaba chuan goal hmahruai a khung a, minute hnih hnu lekah Ante Budimir chuan a chhanglet.
Marco Asensio chuan Real goal hnihna first half-ah khung lehin second half-ah Lucas Vazquez-a’n an goal thumna a khung.
League hmahruaitu Real Madrid hian khelh nga la awmah point 17 in hma an hruai a. Nilaini zan inkhel dangah Atletico Madrid chu Granada in an chelh avangin an inkar a zau zual.
Pathumna a awm Barcelona lakah point 18 in sang mahse khelh hnihin Barca an khel tlem zawk.