Aizawl: Congress Vice President Lal Thanzara chuan inthlan dawna MNF thutiam pakhatmah thleng dik a la awm lo tih a sawi.
Congress Bhavan-a MPCC-in political session nimina an neihah thu sawiin Lal Thanzara hian, MNF thutiam reng reng hlawhtling a awm ngai lo tih a sawi a. “Inthlan dawnah MNF hian mipuite thil tam tak – Kawngchhawng siam te, cheng nuai thum semte min tiam a. Tunah an term a tawp tep tawh a, inthlan dawna an thutiam pakhatmah thleng dik a la awm lo,” a ti.
MPCC Vice President hian MNF chu BJP nena an thawhhona chungchana thudik tawk lo sawi thinah puhin, “Mizoram chhim lama thu a sawinaah chief minister Pu Zoramthanga hian, ‘BJP hotute Pathian biak atang hian inzawm chi kan ni lo,’ a ti a. BJP nen an thawh dun nasat dan ngaihtuahin he thu sawi hi dawt chiang tak a ni tih ka puang duh a ni,” tiin, MNF party chu North East Democratic Alliance (NEDA)-ah member niin BJP nen an thawh dun thu te, kum 2018 inthlanah MNF candidate zawng zawngin BJP atangin tanpuina pawisa dawng vekin, pawisa petu pawh tuna Assam chief minister ni ta Himanta Biswa Sarma a nih thu a sawi.
Chief Minister berin sum siam nan Lengpui Airport hman a duh avangin a hman tangkai theih tur mi thunei tuah a dah sauh sauh tih sawiin, “Airport chei that hna chu an sangawizawnpui Kamrula Chhangte an thawh tir ta chat a ni. Mahse, chung lamin tha a ti lo ani ang, a chim ta rup mai a nih kha,” a ti a. Lengpui Airport chim kha sorkar pangngai nei ila enquiry committee din a, chhui fiah ngei ngei tur chi a nih thu a sawi bawk.
ZPM party chungchang sawiin Lal Thanzara hian, “ZPM hian kalphung hlui ti a nasa taka an aupui thin, tihbo an tum MLA hlawh tihhniam te, MLA car leina senso sang lutuk te, Unit system nuai bo te, inlawmluh bung bung te, Chakma tel loa sorkarna siam an tumte chu an bawhchhe leh vek tawh a. Designation plate tar loh an aupui laiin an MLA-te leh AMC councillor-te chuan permanent-in an tar leh si a ni. Kalphung thar an aupui hi anmahni zawkin an bawhchhe leh nghal zel. Chuvangin, rin tak tak tlak an ni lo,” a ti.
Lal Thanzara hian MLA candidate nih kher a tum lo tih a sawi a, “MPCC vice president ni mah ila, kei aia mipuiin an pawm, ram tana sorkar tha pe thei tura an rin zawk an awm a nih phawt chuan ka dinhmun hi ka kian phal a, candidate nih ngei ngei hi ka tum chuang lo,” tiin, ram leh hnam tana sorkar tha neih theihna tur a nih phawt chuan a pawm zel tur thu leh, sorkar tha siampui turin Mizoram mipui zawng zawng a sawm a ni.