Bayern Munich chuan Bundesliga title a zawnin vawi 10-na atan an chawi a. Inrinni zanah German football a inkhel lian ber Der Klassiker-ah Borussia Dortmund hnehin an champion.
Allianz Arena a inkhelah hian an hnuai chiah a awm Dortmund lakah Bayern in 3-1 a hnehna changin harsatna an tawk lem lova. Minute 15-naah Serge Gnabry chuan goal a khung a, Robert Lewandowski chuan minute 34-naah an goal hnihna a khung.
Emre Can-a’n Dortmund tan goal khung ve mahse second half-ah Jamal Musiala chuan Bayern Munich goal thumna a khung leh a ni.
Bayern Munich coach Julian Nagelsmann tana Bundesliga title hmasa ber a ni a. Bavarians hian Germany an thunun chunzawm a, a zawna vawi 10 an champion hma hian a zawna vawi thum aia rei champion thei an awm lo.
Tun season-ah Bayern Munich hi league-ah vawi li chauh an tlawm a – Eintracht Frankfurt, FC Augsburg, Borussia Monchengladbach leh VfL Bochum te an hneh lo. Heti chung hian Dortmund nen an inkar a zau hle thova. An club chanchin a Bundesliga-ah vawi 32 an champion-na niin a dawttu 1. FC Nürnberg chu vawi 9 champion in an inkar a zau hle.
Bayern forward Thomas Muller chu Bundesliga title vawi 11 chawi thei hmasa ber a ni bawk.