Arsenal in Premier League top four inchuhnaah an dinhmun an siam a, an elpui Manchester United beiseina ti mit ve bawkin Emirates Stadium-ah an mikhualte 3-1 in an nghaisa.
Inrinni tlaia inkhelah Gunners hi a zawna vawi thum an tlawm hnuah Chelsea laka chak hlim an ni a. United hi Liverpool lakah 4-0 a mualpho zo chiah an ni bawk.
Inkhel pawimawhah Arsenal in goal an khung hmasa a, an khingpuite tlarhnung pherh tak leh huntha an neihte an hman hleihtheih loh chu remchangah la in phu takin an chak.
Gunners in minute 3-naah Raphael Varane leh Alex Telles te chetsual zarah Nuno Tavares hmangin goal an khung a. Eddie Nketiah goal pawm loh nei mahse Telles-a’n Saka a foul avangin penalty a chawi a, Saka in goal-ah a chantir.
A hnung lamah mualpho mahse a hma lama ball an chanin United an hlauhawm thin a, Cristiano Ronaldo chuan Premier League a a goal 100-na khungin a chhanglet nghal.
Second half-ah United in chance an ngah a, goal ban vawi hnih tih perin Ronaldo goal pawm loh an nei bawk a. Fernandes-a’n penalty a khung loh hnuah Granit Xhaka chuan Arsenal tan inkhel dahtha turin goal a khung.
“Ni hnih leh a chanve inbuatsaihna kan neih hnuah inkhel pawimawh kan hmachhawn lehnghal a, kan tan result duhawm tak a ni.” tiin Mikel Arteta chuan inkhel zawhah a sawi.