Real Betis in Spain a cup inelna Copa del Rey final-ah penalty shootout hmangin Valencia an hneh a. An club chanchin a vawi thumna atan Copa del Rey an chawi.
Inrinni zana La Cartuja Stadium a final inkhel hi extra time zawhah 1-1 a ni a. Penalty hmangin 5-4 in Betis an chak zawk.
Minute 120 chhung inkhelah team pahnihten football hmuhnawm an khel ve ve a. Goal hlauhawm insiam hnem hle in chak zawk nih ngei tumin an khel.
Minute 11-naah Real Betis tan striker Borja Iglesias chuan goal a khung a, hei hi minute 30-naah Hugo Duro chuan Valencia tan a sut.
Seville khaw club hian kum 2005 a he champion trophy an chawi hnua an chawi leh hmasak ber a ni a, hemi inkar hian trophy lian dang chawi an nei lo.
An captain Joaquin chuan, “Kan khuaah ngei kum tam tak hnua he title han chawi leh hi thil lawmawm a ni a, kan fans ten he hun min hmanpui thei hi a tihlu zual.”
“Kan hlawhtlinna hi kum tam tak chhunga thawhrimna leh pek khat zela hmalam kan panna rah a ni. Valencia pawh ka lawmpui a, anni zawk kha champion pawh nise an phu hle ang.” a ti a. Spain winger thin hian kum 17 kalta khan he trophy hi Betis tan tho a lo chawi tawh.