Italy champion Inter Milan chuan Inrinni zanah AS Roma 3-1 in an hneh a, Serie A table chung berah chhovin hma an hruai.
An elpui AC Milan chu nizana inkhel tur an nih chauh avangin Inter hian dinhmun tha zawk an lo luah lailawk a, Milan hian hnehna changin khum lehnghal pawh nise Inter hi khelh khatin an khel tlem zawk.
San Siro a inkhelah a zawna match 12 chhung tlawm tawh lo Roma lakah Inter tan Denzel Dumfries chuan goal hmahruai a khung a, halftime hma in Marcelo Brozovic chuan goal hnihna khungin halftime zawhah Lautaro Martinez chuan an goal thumna a khung.
Roma tan minute 85-naah Henrikh Mkhitaryan chuan goal khat a khung ve bawk.
Inter hi a zawna vawi li league-ah an chakna niin khelh 33 atangin point 72 an hmu mek.