- VIDPUIA HRAHSEL
Thil zat lawr khawmna chhinchhiahna lehkhabu (Statistical Handbook Mizoram) kum 2020-a tih chhuahin a tar lan danin, Mizoram chhiarpui hnuhnung ber kum 2011-ah khan Mipa mi 555,339 leh Hmeichhia mi 541,867 kan awm a. Hmeichhia aia mipa tamna hi 13,472 a ni. Kum 2011-a Economics & Statistics Department chhiarnaah chuan hmeichhe voter aiin mipa voter hi 13,664-in an tam zâwk a. Kum 2018 a lo her chhuah meuh chuan, mipa voter aiin hmeichhe voter hi 15,121 in an tam ta zawk. Kum sawm a liam tawh a, chhiarpui neih a la nih loh avangin mihring cheng zat hi a danglam tawh ngeiin a rinawm. Kum 2019-ah khan mipa 4,052 an boral a, hmeichhia 2,554 an boral. Kum 2000 atanga April ni 5,2022 thleng khan ruih hlo vangin mi 1271 an boral tawh a. Heng zinga mi 1,110 chu mipa an ni. Heng atang tea lang chiang em em chu Mizo mipate nun a tawi a, kan nun a tawi chhan ni bera lang chu ruih theih thil vang a ni.
Zir chianna atanga a lan dan chuan mipa an thi nasa a, nau piang thar pawhin chung mitthite hmun ruak chu an hnawh khat zo lo. Kan thil tawn mek atang hian a bik takin Mizo mipate tan kan lak nasat a ngai hle mai. Kan hmeichhiate’n innghahna tlak Mizo mipa an vai lutuk dawn, khua a tlai hmaa kan insan mar a va ngai em. Mizo mipa chuan a hnam tan, a chhungkaw khai ding turin tan a la tur a ni. Nupui fanau chawm zo turin kan that lai hun hi kan hman tangkai deuh deuh a va ngai em. Khawvel changkannain a ken tel, Social Media kan hman danah te hian a bik takin mipate hian zir tur kan ngah a, eng emaw thil thleng reng rengah a tawng tam tam, a inhnial peih peih kan kat nuk a, hmeichhe tih tawk leka ngaih hi mipate zawk hian kan buaipuiin tul lovah kan hun kan hmang nasa hle thin.
Hmanlai chuan Mizopa chuan a tawng kau chheh sual hlau takin fimkhur tak leh zaidam takin a awka a hmang thin. Tun laiah chuan mipate zawk hi a tawng tam tamah kan tang a, hengte vang hian kan zahawmna kan vawng him lo chawk thin. Mipate hian kawng hrang hrangah zir tur leh insiam thatna tur kan ngah khawp mai. Ei zawnna thu-ah ni se, hmun hrang hrangah hmeichhia zawkin ei an zawng nasa tih mai tur a ni. Ram leh hnam hmelma ruih hlo vangin kan hmangaih kan nuta, kan pasalte’n ruihhlo ngaite enkawlna hmun an luah thup a, kan ramah ngei hian ruih hlo ngaite enkawlna hmun (Rehabilitation Centre) hi zathum (300) chuang zuk awm a! Ruih hlo bawiha mipa tam tak an tan vangin hmeithai an tam phah a, zirna kan hlamchhiah a, loh theih lohna vangin nu berin ei an zawn a ngai a, mi tam tak chuan duh angin kan fate pawh kan uap lum zo lo chu a nih hi. He hnam than mawh bawk lian tak chu mipa leh hmeichhe hna thawh tur bika awm ngai tlat, mipa tih tur leh hmeichhe tih tur kan thliar thin hi a ni. Mipain hmeichhe tih than a thawh hian a pa lo riaua inngaihna rilru hi zuk awm a! Chutiang chiah chuan hmeichhiain mipa tih than a thawh emaw a tih hian nu ta lo riau, hmeichhe tih atan a mawi lohna awm miah si lo hi zahah kan la tlat zuk nia!
Hetiang renga kan hnam hi a kal chuan hnam boralna kawng kan zawh mek chu a ni. Kan mu tanna atang hian kan thawh chhuah a va hun ta em. Kan hnam tana hlauhawm lo thleng tur inhrilh lâwkna hi mi tin hian mutmawh hnarmawha kan neih a hun ta e. Mizo mipate hi kan nihna kan hloh ta vek emaw kan chhe ta duai emaw kan zuai ta der tihna a ni lo va, insiam thatna leh inzirna tur kan neihte atang hian kan hnam tan, kan ram tan hian hawh u, phei khai i vawr ang u tiin kan insawm a ni. He hnam a lo than len a, a kal zelna tur kawnga mawh phurhna kengtu mipate hian kan nihna leh kan chanvo, kan tih turte hi hlen ngei tumin kan zavai hian he hnam tan hian kan sal tanna atanga kan thawh chhuah a ngai a ni. Pi Lalramhluni pawhin a hla thu-ah, “Zo hnam val rual chhuanawm te u, in tlawm mai dawn em ni? Ruih hlo tinreng tawnah,” tiin min fuih a nih kha.