Bayern Munich in an striker Robert Lewandowski chu tun nipuiah an chelh chhunzawm thei dawn lo a nih chuan a thlaktu tur an melh ru tan a, heng zingah hian Ajax Amsterdam striker Sébastien Haller a tel.
Ivorian striker hi tun season-ah Dutch Eredivisie leh UEFA Champions League-ah te a che tha hle a, hei vang hian Europe club lian ten an ngaihven.
Premier League-ah West Ham United zawmin beisei anga hun a hman loh hnuah Ajax tan season hnih chhungin goal 46 khungin assist vawi 16 a nei bawk. Milan khaw club pahnihte pawhin Haller hi an ngaihven.
Bayern striker Lewandowski hi Barcelona nen sawizawm a ni fova, Spain lam a pan dawn a nih chuan German champion in striker rinrawl tur thar an dap a ngai dawn.
Ajax hian tuna Bayern Munich atanga loan a Belgian club Anderlecht tana khel mek striker Joshua Zirkzee chu an ngaihven ve thung a. Hei vang hian German club in Haller lakluh nan hman tel an remti mai dawn niin an thu a thang mek.
Bayern Munich hi tunhnaiah Ajax player dang pahnih – Noussair Mazraoui leh Ryan Gravenberch te nen sawizawm an ni ve bawk.
Kum 33 mi Lewandowski hian kum 2023 thleng Bayern ah hian contract a nei a. Bayern in contract thar ziahpui an duh a, Barcelona president Joan Laporta chuan an ngaihven thu a lo sawi tawh bawk.