Aizawl: Govt. T. Romana College hnuaia Thingsiri Cultural Club chuan tun hnaia lawmman an lak lawmna nimin khan an nei a. MJA President C. Lalrambuatsaiha chuan khuallian niin a hmanpui.
College tuala hun hmanah Thingsiri Cultural Club adviser atana ruat thar, MJA president chuan thu sawiin, “Mizoramah pawl kan din zung zung a, a then chu mahni hamthatna atante a ni a. He club erawh chu ram leh hnam tan a ding, hnam dang zingah Mizote min pho langtu tangkai tak in ni,” a ti.
C Lalrambuatsaiha chuan, “Mizote hian hnam dang angin infrastructure leh industry ropui nei ve lo mah ila, talent kan nei tha a, kan hnam zai leh lam hmangin khawvelin min hmelhriat ve thei a. |awng chu bo thei a nih laiin culture erawh a bo ve thei lo,” tiin, he club-in patron atana MJA president an lo hman tawh thin angin MJA chuan theihtawp a chhuah zel tur thu a sawi.
Govt. T. Romana College Principal Dr. Jenifer Lalbiakdiki chuan an college hnuaia mi, Thingsiri Cultural Club-ten trophy pathum ngawt tun hnaia an lak theih chhan chu zirlaite leh hemi lama theihtawp chhuahpui thintu MZP leh MSU thlawpna an dawn that vang a nih thu a sawi.
Kum 2010 khan Thingsiri Cultural Club hi din niin, kum 2021-2022 chhungin MSU Cup-Cheraw-ah pakhatna, MZP Inter College Cultural Competition-Cheraw (Buhzai) ah pahnihna leh Tribal Dance Hunt-Aizawl District ah lawmman pahnihna an la a ni.