Aizawl: Mara Autonomous District Council (MADC) inthlanah MNF candidate-te thlan tlin a nih chuan thuneihna sang tak state sorkarin a pek tur thu MNF Adviser Dr R Lalthangliana’n a sawi.
MADC inthlan lo awm tur atana campaign-a feh chhuak mek MNF adviser hian nimina Saiha-a hmun hrang hrangah thu sawiin, “MADC-ah hian kan member-te in lo thlang tling a nih chuan, bial chhungah thuneihna sang tak kan pe lo thei lo. Kan aiawha in thlan tlinte an nih avangin Aizawl atangin thil engkim kan rawn tih a rem lo ang a. Anamhni thuneihna kan pe dawn a ni. State sorkarin kan candidate in thlan tlin chuan thuneihna sang tak kan pe ang. SEDP lama thuneihna leh he lam hna hrang hrangah thuneihna kan pe bawk ang,” a ti.
MADC-ah hian Congress ngar ngar a la sorkar a, BJP a sorkar leh a, an thuhmun reng tih sawiin, “LADC-ah seat 25-ah seat 20 kan la a. He lai MADC-ah hian tui let hnua kan beih ngai loh BJP kan bei ta a, a hma kha chuan Congress kan bei thin a, he laia Congress leh BJP-te hi a mihringa thuhmun vek an ni a, danglamna an awm lo,” a ti bawk.
Dr R Lalthangliana hian an hmachhawpte sawiin, Siaha-ah health department lamah project lian tak tak, building tam tak sakna tur an neih nual thu te, heng laia mamawh zawng zawng hi project-ah dah luh deuh vek an tum thu te, Sub-Centre upgrade-in health & wellness officer awptir veka district council area-ah hian dah an tum thu te, quarter chhe lutuk tawhte pawh thuam that vek tuma hma an lak mek thu leh Siaha College-ah Science zirtu an neih theihna turin sum dinhmun en pahin theihtawp chhuah an tum thu te a sawi.
MNF sorkar kum thum leh a chanve chhungin inthlanna hrang hrang, an sorkar ngai lohna inthlannah te thlengin hnehna an chan thu leh tun inthlanah pawh hian Pathian tanpuinain hnehna an chan leh tur thu a sawi bawk.