NSCN (I-M) chuan union home ministry chu Naga politics-in hun khirh a tawn laia thutlukna siama thuchhuah lo nei ve ngawt thei turin theihna a nei lo niin an sawi.
NSCN (I-M) leh India sorkar hian kum 23 chuang mah inbiakna an lo kalpui tawh a, Naga politics-a inrem lohna awm chin fel an tum a; mahse, an la inching fel thei lo zel.
Nimina thuchhuah an siamah, “Indo-Naga political talk hi prime minister hriapuina hnuaia lehlam lehlam inhriat thiam tawnna nena kalpui a ni,” an ti a. Lehlam zawk ringawtin thutlukna siam mai thei a nih loh thu an sawi.
NSCN (I-M) chuan August 1, 1997-a India sorkar nen inkahhai an puan khan inbiakna hi prime minister level-ah, ram pawn lamah, eng thu mah inrinlawk sa nei lo ve vea kalpui tur a nih thu an sawi bawk.
“Hetianga thu dah a nih lai hian prime minister ni lo mi dangin, thu inchuh lai, Naga national flag chungchang leh inkahhai puan chungchangte pawh thuchhuah an siam a, hetiang theihna hi an nei lo,” an ti.
NSCN (I-M) hian Union Home Minister Amit Shah-an Nagaland Chief Minister Neiphiu Rio hnenah New Delhi-a an inbiak tumin Naga-ten flag hran leh danpui hran an neih a rem ti lo tih sawi a awm hnuah hetiang thu hi an sawi.
Shah hian Rio hnenah hian Naga flag hi Naga Day-ah chuan zar turin a ti ve thung bawk.