Paris Saint-Germain defender Sergio Ramos chuan French champion tana a season hmasa ber chu inhliamin tibuai nasa hle mahse season tharah club in a laka an beisei ang ngei a khelh a tiam.
Kum 36 mi hian tun season tan dawn a PSG tana kum hnih contract a ziah hnuah tun season-ah inelna hrang hrangah vawi 10 chauh a khel a. Inhliam avangin pawn lamah a buai rei hle.
“PSG kawr ha in khelmualah darkar tam ka hmang lo. Ka vanglai hun a la liam lova hei hi ka team tharah hian pholan hi ka duh. Angers laka goal ka khung tum kha season thara tha zawka khel tura ka beihna nemnghehna a ni.” a ti a.
Ramos hian chawn hliam avanga thla nga chhung a buai hnuah November 28 khan PSG tan a khel tan thei chauh a. Hliam dang neuh neuh neiin Paris hi a chhuahsan leh mai dawn nia sawi thawm thlengin a awm hman.
Tunhnaiah erawh PSG inkhel hnuhnung pali atanga pathumah bul a tan vek a, kar hmasa a league champion an nihna tura Lens nen an inhnehtawk tum pawhin a khel.