Sipai rorelna ram, Myanmar-a court chuan an ram hruaitu hlui, Aung San Suu Kyi chu dan bawhchhiaa an puhna hrang hrang zinga pakhat, thamna lak thubuaiah thiam loh a chantir leh ta.
Suu Kyi-i hi tar lan tawh thin angin February, 2021-a sipaiten mipuite thlan a sorkar an paih thlak atang khan pawn chhuak thei lova la hren char char a ni.
Kum 76 mi ni tawh, Nobel Peace Prize pawh lo dawng tawh hi an ram dan eng emaw zat bawhchhiaa puh a ni a, heng zingah hian vote thlak tichingpena puhna pawh a tel.
Sipai sorkarin an puhna hrang hrang hi a dik lo tih a sawi tawh thin a, mihring dikna chanvo humhalhtute pawhin court-in a chungthu a rel a kalpui dan chu an dem thu an sawi bawk.
An khawpui, Nay Pyi Taw-a vantlang leh chanchinbumite hriat lohvah a chungthu rel a ni a, a aiawha ding dan hre mite pawh chanchinbumite hmaa engmah sawi lo tura tih an ni bawk.
Nilaini khan sipai rorelna rama court hian an rama khawpui lian ber, Yangon khawpui roreltu hnen atangin pawisa fai leh rangkachak tlangin thamna $ 6,00,000 zet a dawng nia puhnaah thiam loh a chantir a ni.
Kum nga chhung lung in tang turin a hrem a. A dan hre mite chuan amah pawh an la hmu lo niin BBC an hrilh.
Hremna an pek thar ber leh nen hian Suu Kyi-i hi kum 11 chhung tang tura hrem a ni ta a, a thubuai an ngaihtuah hmasakahte pawh lung in tang tura hrem nual ani sa tawh a ni.
December thla khan sipai dan zawm lo leh Covid-19 dan zam bawhchhiaa puha thiam loh chantir a ni a. January khan kawl phal loh, walkie-talkie radio a kawl avang leh Covid dan bawk bawhchhiaa puhin thiam loh chantir a ni bawk.
Suu Kyi-i hian ei ruk thubuai 10 dang a la awrh mek bawk a, hengte hi a mal mal pawhin thiam loh chan chuan kum 15 thleng tan theih a ni a. Inthlan tichingpena puhna leh ram thuruk vawnna dan bawhchhiaa puhna a la tel bawk.
Amah tantute chuan an puhna zawng zawng chu sipaite phuahchawp vek a nih thu an sawi a, an tum ber chu an rama mipui rorelna a din theihna tura mipuite nghahfak la ni reng, Suu Kyi-i chu a dam chhung lung in tantir a nih thu an sawi.
An puhna zawng zawngah hian thiam loh a chang vek a nih chuan a vaiin kum 190 chuang zet tan ina hun hmang tura tih a ni thei niin mi thenkhat chuan an chhutsak.
Mihring dikna chanvo humhalhtu leh mipui rorelna tun din duhtute chuan Suu Kyi-i chunga sipai roreltute thil tih dan hi an dem hle a. UN pawhin court rorelna kalhmang chu an pawm lo tih sawiin Human Rights Watch pawhin court-a thil kalpui dan thuhruk a ni tlat chu dan bawhchhiatna zawk niin a sawi.
Myanmar-a sipai sorkar erawh chuan an puhna hi phain Suu Kyi-i chungthu hi dik (fair) taka ngaihtuah a nih thu leh an kalpui dan pawh tihdan pangngai vek a nih thu an sawi ve thung.
Myanmar buaina
Myanmar-a sipaite hian Suu Kyi-i kaihhruai, National League for Democracy (NLD)-in an ram inthlanpuia chiang taka hnehna an chan hnu lawk, nikum February khan tharum nen paih thlain thuneihna an chang zui.
Sipaite hian inthlana hnehna an channaah NLD hian vote an tichingpen nasa niin an sawi a; mahse, a hranpaa chhuitute erawh chuan inthlan hi dik leh zalen taka neih a ni an ti thung.
Sipaiten thuneihna an hneh chhuh hi an ram mipuiin nasa takin an dodal a, ram pumah mipui rorelna duhtu mipuite pungkhawmin dodalna an lantir a, sipaite hian tharum hmanga chhang letin mipui bakah chanchinbumi thlengin an tuar hle.
Thuneihna an chan atang hian Suu Kyi-i bakah an party mi leh sa tam tak man an ni a. A vaiin mi 10,000 chuang zet an man tawh.
Assistance Association for Political Prisoners (Burma)-in a chhinchhiah dan chuan sipaiten anmahni dodaltute laka tharum an thawhnaah hian mi 1,800 an thi tawh.
Boruak lian zualpui chu reh tawh mah se tun thlengin sipai sorkar duh lohna hi a la kal reng a. Hmun hrang hrangah tharum nen veka chhang lettu pawh tawngin buaina leh inkahna a thleng deuh reng.