India chhim lam, Tamil Nadu-a temple-a sakhaw thil tihna hmunah electric-in mi 11 vel a man hlum a, mi dang 15-in hliam an tuar bawk.
Police chuan Thanjavur district-ah temple tawlailirin electric chak tak kalna hrui a tawh palh avangin chhiatna hi a thleng ta tih an sawi.
Thi zingah hian naupang pahnih pawh an tel a. Thuneitute chuan hliam tuar zingah ngaihtuahawm tak tak an awm avangin thi zat hi an pun a rinawm hle niin an sawi.
Thubuai ziah luh a ni a, police-in an chhui zui mek.
Kangthelh pawl hotu pakhat, Bhanupriya chuan generator hmang tawlarlir hi kawng kualah a tang a, insiam rem tuma a tih vel laiin a chung lama current chak tak kal hrui chu a tawk palh ta niin a sawi.
Thil thleng hmutute chuan kawngah tui a lo tlin bawk si avangin chhiatna lian zawk a thlen phah ta niin an sawi a. Tawlailir rual hian mi 50 vel sakhaw thiltihnaa tel an awm a, an insaseng hman nual zawk niin an sawi.
Police thuneitu sangte chuan tun anga thil tihnaah hian an kalkawng turah hian current chak tak pekna hruite chu tihthih (off) thin a nih thu an sawi a. Tun tuma tawlailir an hman erawh heng hruite tawk pha tur khawpa a san loh avangin an off lo niin NDTV news channel an hrilh.
“A cheina bawr tak chuan a tisang zual a, hrui pawh a tawk pha ta a ni,” tiin police hotute thu sawi chu NDTV hian a tar lang.
Video thehdarhah chuan tawlailir hi a chhe vek tih a lang thei.