aIZAWL: CSS Hindi zirtirtu Mizoram Hindi Shikshak Sangh hruaitu ten nimin khan Larsap Hari Babu Kambhampati hmuin, an dinhmun mumallo tak siamthat dan kawng zawnpui turin an ngen.
Hindi zirtrtute chu- an sorkar enkawl Primary leh Middle school-ah te Hindi chu subject pakhat anga zirtir a nih thu leh High school-ah erawh chuan duha zirloh theih a nih thu Larsap chu an hrilh a. Hindi subject chu High school-ah pawh compulsory subject atana hman tul an tih thu an thlen bawk.
CSS Hindi zirtirtute chuan Central sorkar atanga scheme a awm apianga rawih leh scheme a tawp apianga ban an nih thu Larsap chu an hrilh a. Tunhnaiah pawh harsatna tam tak an tawh thu leh a then te phei chu an kum a upat hman thin ava- nga rawih nawn theih loh te an nih thu hrilhin, an hna chu eizawnna ber atana hman ngam a harsat thu an hrilh.
An hna leh eizawnna mumallo tak siamtha tura kawng zawnpui turin CSS Hindi zirtirtute chuan Larsap chu an ngen a. India ramah Hindi a pawimawh avangin nasa zawka thalai ten Hindi an zira, a tawng an thiam a tul hle nia an hriat thu pawh Larsap chu hrilhin, High sch- ool leh Middle school-a Hindi zirna kalpui mekah zirlai ten Hindi tawng an thiam phah vaklo nia an hriat thu leh Hindi zirlaibu pawh tawng thiam theihna tur anga duan that tha an tih thu an hrilh bawk.
Larsap chuan Hindi zirtirtute chu Hindi zirtirna kawnga an hma- laknaah fakin, “Ka mimal ngaihdan chuan Hindi hi India ramah chuan midangte nena kan inbiakpawhna (link language) lar ber a ni a, zir uar pawh tha hlein ka hria” a ti a. Mizo thalai ten Hindi nal taka an thiam chuan Mizoram state pawn Hindi hman tamnaah pawh Hindi thiamlo aiin an tlangnel ngei ngei dawn tih sawiin, eng tawng pawh ni se miin a zir duh leh a thiam duh chuan dodal theih a nih loh thu leh zir tura nawr luih theih pawh a nih loh thu sawiin, tawng chungchangah fimkhur leh mi rilru ti na lo zawnga hmalak a that thu Larsap chuan a sawi bawk a ni.