India ramah Covid-19 kai an pung thar leh mek zel a, darkar 24 liam ta chhung khan mi 3,303 kai hmuh chhuah leh niin mi 39-in an thihpui leh hman bawk.
Hri kai hmuh chhuah tharte nen hian damlo enkawl lai hi mi 16,980 an awm leh tawh a, mi 4,30,68,799-in an kai tawh bawk.
Hri kai enkawl lai hi mi 701-in an pung leh hman a, a kai tawh zawng zawng atanga chhutin 0.04% an la ni mek a. Darkar 24 liam ta chhung hian mi 2,563 enkawl dam leh hman niin mi vaibelchhe 4.26 dawn enkawl dam an ni tawh.
Delhi-ah chuan ni khata Covid-19 kai hmuh hian 1,000 a tling leh tawh a, mi 1,367 kai an awm belh.
India-a sumdawnna khawpui, Mumbai-ah mi 112 kai hmuh ni bawkin February 25 hnua ni khata hri kai hmuh tam ber ni a ni.
Maharashtra Chief Minister Uddhav Thackeray chuan Nilaini khan mipuite chu COVID-19 laka himna tur dan zam zawm turin a ngen thar leh bawk.
“Corona hi a la reh lo va, khawvel hmun hrang hrangah a thar a piang zel a. China-ah chuan mi vaibelchhe 40 zet kharkhip an ni a. Keini pawhin thawh thum kan paltlang tawh a, kan hmangaih tak takte kan chân a ni,” a ti.
Hri kai an pun mek laiin Prime Minister Narendra Modi chuan state chief minister-te chu Covd-19 chungchang a sawipui a. Ral atanga an inkawmnaah hian thuneitute chu inveng rengin, hri leng chu a la reh lo tih a sawi a, sorkar chuan naupang a la thei chin hnena invenna pek chu a ngaih pawimawh a nih thu a sawi.
“Covid avanga buaina kan hmachhawn that mek laiin ram dangte nena khaikhinin hri kai kan pung leh mek a. Kan inralrin reng a ngai a, Covid hian min la kalsan lo a ni,” tiin Modi chuan a sawi.
“Vantlang hmuna Covid-19 laka himna tura dan zamte kan chawi lar la ngai hle a ni,” a ti.